دلا بوشلا بو دنیانی که دنیادن جفا گوردوم
جفاسین چکدیم عمرمده فضاسین غم فزا گوردوم
غم و محنتده غرق اولدوم اوجالدی عرشه افغانیم
اولوبدور مونسیم ناله گنه آه و نوا گوردوم
دولاندیم کو به کو شهری صداقتدن خبر آلدیم
جفا اهلین صداقتدن محبتدن رها گوردوم
خیالین عالمیندیدیم دولاندیم گزدیم عمرومده
قالاندور عالم امکان خیال اوسته بقا گوردوم
بهاری عمرومون کئچدی یئتیشدی چون خزان فصلی
بو بش گون عمرومون حتی بقاسینده فنا گوردوم
بلایه لا دئدوم اما بلالر همدمیم اولدی
بلایه ایلدیم عادت بلالرده وفا گوردوم
اوچوبدور طایر روحیم دولاندیم کوفه شهرینده
نظیری اولمویانلاردان گوزل بیر مقتدا گوردوم
گونوز تخت خلافتده اولاردی یار مظلومان
او مولانی گئجه وقتی که پایلاردی غذا گوردوم
چکردی باش فقیرانه عطادن دویمویان مولا
ائدوب حاتملری حیران اونی بحر عطا گوردوم
گئچوب گونلر اولوب ماه صیامین چون شب قدری
یاخونلاشدی عبادتده اولا دینه فدا گوردوم
گلوبدور مسجده مولا گئچوب شوقیله محرابه
که محراب عبادتده دعاسین برملا گوردوم
رکوعیله سجودینده دیور یا ربنا العفو
اوجالمیش عرش اعلایه نوای ربنا گوردوم
دایانمیشدی نماز اهلی نماز صبحه صفلرده
او مأوای محبتده بیرین اهل خطا گوردوم
چکوبدور زهریلی تیغین ووروبدور ملجمین اوغلی
بولوبدور حیدرین فرقین وسطدن من جدا گوردوم
بویاندی قانینه جسمی چیخوبدور ناله افلاکه
فضای مسجدی اول دم اولوب محنت سرا گوردوم
هامی ناله ائدور اما علینون شکوه سی یوخدور
باتان وقتینده آلقانه او مولانی رضا گوردوم
دیور ای خالق کعبه یقیناً رستگار اولدوم
که درگاه خداونده ائدور حمد و ثنا گوردوم
آخوبدور قانی از بسکه گئدوبدور جسمی تحلیله
سارالدی گول کیمین رنگی او شاه لافتا گوردوم
قویوبلار بیر کلیم اوسته غرض مولای مظلومی
ایاقیمله گئدم خوشدور دئدی اول با وفا گوردوم
اگر گورسه بو حالتده مسلم زینبیم قورخار
گلوبدور اوز ایاقیله اوگون باشدا یارا گوردوم
منیم عرضیم بودور مولا که راضی اولمادون گورسون
قیزون زینب او حالتده سنی یا مرتضاگوردوم
ندن بس گلمدون کرب و بلایه روز عاشورا
جفادن دویمویان دشمن ائدوب جور و جفا گوردوم
حسین دوشموشدی گوداله گلوبدور مقتله زینب
دوتاندا خنجر شمری او بانوی حیا گوردوم
یالین الده یالین خنجر مسلمدور که نسبت یوخ
تکان تیغه وئرن وقته او گون شمر دغا گوردوم
حسینون باشینون اوسته یارالاندی قیزون زینب
گنه درد و مصیباته اولوبدور مبتلا گوردوم
حسینون باشی ذبح اولدی قالوبدور چاره سیز زینب
بلالی باشینه سالدی قرا اوستن قرا گوردوم
بودردوغمده .سالکده.عذاره گوزیاشین باغلار
دیر ایوای حسینیم وای قورار بزم عزا گوردوم
- یکشنبه
- 23
- خرداد
- 1400
- ساعت
- 19:11
- نوشته شده توسط
- یوسف اکبری
- شاعر:
-
رحیم سلمانزاده
ارسال دیدگاه