عشق ملکینه بوگون پادشاهی یخدیلار
سجده گاه عشقیده قبله گاهی یخدیلار
لرزه عالمه سالوب اِبن مُلجمون اَلی
اهل عرش اَنور یره حیدری گورَه ولی
بستریدن آز قالور تپراقا گئده علی
عدلی قانه غرق ائدوب دادخواهی یخدیلار
چوخ سوزی واریدی لیک تاپمادی بیر هَمدمی
تپراقا آپاردی اول سینه دَه اولان غمی
دیل یارسینون اولوب باش یاراسی مَرهمی
منبر و مِناره دن عِزّ و جاهی یخدیلار
یوخ بو دَهر فانیده مرتضایه بیر مَثل
شاهکار خلقتی خلق ائدوبدی لَم یَزل
هر خَزَف بو گوهره آچدی بَیرق جَدل
وا مصیبت ای خدا مرد راهی یخدیلار
کوفه دن اوجالدی تا نُه سَمایه شور وشین
توش اولوبدی گوئیا آه و درده عالمین
باشی اوسته آغلاشور باش باشا حسن حسین
سَسلدی ستاره لَر قرص ماهی یخدیلار
ایستدی بو دَهردون بیرده کامیاب اولا
جام صبر شیعه لر وار یری اگر دولا
کوفه ده یتیمیلَر بو گجه باخار یولا
چاره سیزلرون داخی یوخ پناهی ، یخدیلار
نالیه گلردی نِی حُزن سوز و سازینه
واله ایدی قُدسیان رازینه ، نیازینه
عرشون اهلی اِقتدا ائتدیلر نمازینه
طاعتینده چشمهء اشک وآهی یخدیلار
اَل اَله وئروبدولَر اهل کینه اهل شر
یوم حشره جک اولا حَقّون اهلی دیده تر
داده گلدی ظلمیدن عرش وفرش و بَحر و بَر
پیکر حقیقتی ای الهی یخدیلار
- شنبه
- 12
- تیر
- 1400
- ساعت
- 19:53
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه