دریای وفا ،شیرخدا،شمس ولایت
آئین شرف،مظهر حق روح عبادت
عَدلی،عَملی،عِلمی،وجودی،حرکاتی
شیرین سخنی،خطبه سی محکم اثراتی
حیرتده قویان نُه فلکی،شمس و کُراتی
اَللر دوتان اَل صاحبی ،مِرآت حقیقت
مِصداقِ طَریقتدی ،ترازوی شریعت
صِفینیده بیر مرد قَوی پنجه و مشهور
اسلام عَلمین یخماقا گلمیشدی او مَقهور
شرکت ائلدی جنگیده گلسون اَله منظور
یاددان چیخادوب قدرت حَیّ اَزَلینی
میدانه گلوب ایستدی میدانه علینی
درک ایلدی بو دعوتینی مالک اشتر
میدانه او اثناده قدم قویدی بوافسر
یوز دوتدی حریفه دئدی ای خَصم بَداَختر
تا ساقدی علی نوکری بو ضِیغم میدان
هر بی سروپا جنگینه گلمز شه مردان
لبخند وروب افسر اسلامه او جاهل
سرمست زر وشهرت اولوب مقصدی باطل
یوز مالکه دوندردی اولا صحبته داخل
سن گئت دئدی قوی بَدر دُجانون ئوزی گلسون
میدانه دیون شیر خدانون ئوزی گلسون
مِهمیز وروب مَرکبین اویناتدی او شامی
یوز لشکر اسلامه دوتوب چکدی لِجامی
بیرده اوجادان سَسلدی میدانه امامی
اوچ دفعه همین دعوتی چون ایلدی تکرار
آخرده بو دعوایه گلوب حیدر کَرّار
میدانه قدم قویدی علی اَشجع والا
اَلده ایکی باش تیغی اولوب رَزمه مهیا
یوز دوتدی حریفه بِله اَمر ایلدی مولا
لَفظونده سنون قدرت بازو سوزی گلدی
گوستر هُنرون جنگه علینون ئوزی گلدی
تا گوردی جمال حَقی حَق مَعبرین اوسته
ساق اَلده عمودی دولانوب لَنگرین اوسته
اَندیردی اونی قدرتیلن حیدرین اوسته
قلخانینی حائل ائلیوب پیکره حیدر
بیرضربه وروب ضربتینه صف شکن اَللر
چون دوشدی عمودی اَل آتوب تیغ جفایه
شمشیریله یورش گتوروب شیر خدایه
الله اَلی قالخیزدی اَلین اوندا هوایه
دشمندن اوخیبر یخان اَل فرصتی آلدی
بَه بَه سَسی عرش اوسته مَلکلردن اوجالدی
قَهریله قوی دشمنی چون مَقتله سالدی
شام اهلینی تَشویشه همین مَرحله سالدی
لشکر قاریشوب بیربیرینه وَلوَله سالدی
خوار اولدی علی دشمنی ئوز کینه سی اوسته
حضرت دیزینی قویدی اونون سینه سی اوسته
وئردی حرکت خنجرینه حجت یزدان
تا مُهر عَدَم بیرده گوره دستهء بُطلان
گلدی دیله عِجزیله همان شامی هراسان
اَل ساخلا قِتالیمده دئدی بو سوزه خاطر
عَفو ایله منی شامیده آغلار گوزه خاطر
سن میر عرب رهبر اَقشار عَجم سن
تصدیق ائدورم سن دِیَنی میر اُمَم سن
من روسیهم سن ولی دریای کَرم سن
رحم ائت منه ای رحمتی بی حَدُّ وکرانه
بیرخوردا قیزیم وار یولومی گوزلر اَلانه
دشمندن ائلیکه بِله صحبت دیله گلدی
دریای کَرم داشدی گِنه ساحله گلدی
رحمه اوزوگون بَذل ائلین سائله گلدی
فرمایش ائدوب رحم ائلدیم حرمت داور
دورگئت وطنه ایندی بالون یولّاری گوزلر
حِیرتده قویوب عالمی بو عدل و عدالت
طبعیم قوشی بو یرده گَزر آیری حکایت
خامه گِنه پَردیله ائدر غملی اِشارت
اولمادی رضا شامیده بیرقیز یولا باخسون
قوینوندا اَلی گوزیاشی رُخسارینه آخسون
عَکسینده علینون عملی جِلوه گر اولدی
اولادی اونون شامیده دائم مَلر اولدی
ویرانه سوزون قوی دانیشوم گور نَلر اولدی
خامه گِنه غملردن آخان اولدوزا آغلار
ویرانه بوجاقینده ئولَن بیر قیزا آغلار
بیر خورداجا زهرا سوزی بو مَحفله گلدی
باریکیدی مطلب که سخن نِسگیله گلدی
یَابنَ الحسن عَفو ایله منی سوز بِله گلدی
ویرانهء شامون دوتولان ماهی رقیه
شیرین دیلیله سَسلین اللّهی رقیه
اولسیدی یوخی عارض او دلبند ربابه
رُخسارین ئوپردی گِنه ده خاک خرابه
گویا که قِزیل گُل سَپَه لَنمیشدی تُرابه
زینبده دیردی بو بالام خسته دی خسته
زهرادی یاتوبدور ائله بیل تُپراقین اوسته
آخشاملار اونا سِیر زمانه یوباناردی
هرلحظه نی بیر ایل بِله اَیّامَه ساناردی
صُبحون قوشی تک صبح زمانی اویاناردی
اَل سینه ده ویرانه قباقینده دوراردی
قاره یِل اَسوب تِللرینه شانه وِراردی
ویرانهء شامی دئدی دیلدَن دیله سالّام
یولّار قباقیندا دورارام گوز یولا قالّام
گون باتسا گِنه رشتهء زُلفی اَله آلّام
اولموبدی مسافرلریم ایچره گَلن الله
آز قالدی منه کوینگیم اولسون کفن الله
تَشبیهم آنام فاطمیه درد و مِحنده
ویرانه ده من آغلادیم او بیت الحَزَنده
ثانی گوزومه گورسَنوری شمری گورنده
زهرا نَنَمون نِسگیلینی ایلدیم اَظهَر
یول یول گوگَرَن جسمیم اونون جسمینه بَنزَر
(نادر)ائله سن عرصهء تاریخی سیاحت
تاپ یازماق ایچون دفترووَه یاخشی عبارت
نَظمه چکیلوب میرزا حَبیبدن بو روایت
هر بیتینه بیر بیت بَقا قیمتی اولسون
عُقباده اولان مَنزلوون زینتی اولسون
- یکشنبه
- 13
- تیر
- 1400
- ساعت
- 22:18
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه