گوزلیم یتوردی فراقیله منیم عمرومی باشا گوزلرون
دئنه راضی اولمیا چشمه تک دولا گوزلریم یاشا گوزلرون
او کمان قاشون مژه تیرینی آتوری دوزور سینم اوستونه
وئرور حکم قتلیمی دم بدم توکه قانیمی پاشا گوزلرون
دوشورم دالونجا گلم دیزیم یریمور گلم بودور علتی
قویا سنگ نازی فلاخُنا باسا قورخورام داشا گوزلرون
ايله دربدر ایلیوب گوزون منی سالدی کوچه و برزنه
اونی کافی بولمدی قيس تك منی سالدی داغ داشا گوزلرون
گوزومی او گوزلره گر تیکم گِلِهء محبتی آنديرام
بودی واهمم کی دونه گده گِلَه مرزينی آشا گوزلرون
اورگیمده نیَّتیمی بوله، چووره یوزون یوزومه باخا
بولرم کی واردی محبتی تیکه گوز گوزه قوشا گوزلرون
نه منه باخور نه رقیبیمه، دولانور بو دور زمانه تک
نگرانیم دولانوب گده دوشه قوش کیمی بوشا گوزلرون
اولوم آرزو ايدورم دونوب منه باخموری یانوب آغلورام
نه علاج ايدوم گینه کج باخور دییور اُلمه قال یاشا گوزلرون
اورگیوه سالما سوزی حسن، غم و محنته داخی ويرمه یول
دئمه یاره چوخ نگرانیم قویا منله باش باشا گوزلرون
- جمعه
- 1
- مرداد
- 1400
- ساعت
- 20:50
- نوشته شده توسط
- یوسف اکبری
- شاعر:
-
حاج حسن یعقوبی تبریزی
ارسال دیدگاه