زیب ایله قلم مطلع اشعاره خدیجه
تعریف اولا هر عاشق اطهاره خدیجه
بانوی گرانقدردی عالیّه مقامی
محبوبه دی حتّی حق داداره خدیجه
از بس تاپیب آللّهه تقرّب لقب آلدی
مؤمنلره مادر بلی همواره خدیجه
توفیق سعادت تاپیب الطاف خدادن
حاصل یتشیب دولت بیداره خدیجه
دوشیزیدی باکره وصلت ایلینده
پیغمبر خاتمله او مهپاره خدیجه
بعضی خبر کذب یازیب بیوه زنیدی
چون زوجه اولوب سیّد ابراره خدیجه
اشراف قریشیدنیدی صاحب ثروت
زیبندیدی ارزش بسیاره خدیجه
بخت اولدوزی چکدی اونی اوج برکاته
باخ گور نه چاتیب شوکت سرشاره خدیجه
القصّه گلیب وحی ائوینون اولدی عروسی
فخر ایلدی شایسته ی ادواره خدیجه
حرمت اونا ایلردی صمیمانه محمّد
جان سؤیلردی احمد مختاره خدیجه
چون تاج نبوّت باشینا قویدی پیمبر
یار اولدی او مبعوث سزاواره خدیجه
نسوان آرا اوّل نفر ایمان گتیریبدی
اوز همسری دین رهبری دلداره خدیجه
جبریل سلام ایلریدی نازل اولاندا
کئچمیشدی نچون زمره ی اخیاره خدیجه
مال و حشمین صرف ائلدی رونق دینه
ارزش نقدر وئردی گور ایثاره خدیجه
اسلامه گوره ماملکین آتدی گوزویندن
نصرت ائلدی واقف اسراره خدیجه
آتمیش بشدی سنّی گئدیب دار فنادن
مسکن ائلدی تپراقی یکباره خدیجه
بیچدی کفن اوز پیرهنیندن اونا طاها
قویدون منی حسرت دئدی دیداره خدیجه
گوردی آناسین فاطمه باش قویدی ترابه
دوشدوم غم الیندن دئدی آزاره خدیجه
بش سینّده بیر طفلدی زهرای عزیزه
بیلموردی گئدور جنّته یوخ چاره خدیجه
هر دم سوروشیدی بابا قالدیم آنا سیز من
گئتدی هارا قویدی منی آواره خدیجه
ایوای آنا سسلندی فراقون نه چتیندی
زهرا هله محتاجدی غمخواره خدیجه
بو تئزلگه دویدون ننه مندن نیه خاطر
سالدی باشیما دست قضا قاره خدیجه
بیلموردی دوشر فاطمه بیر گون اوزی دلدن
ال باشدا گلر وای بالا اظهاره خدیجه
شهلا گوزی قان سینه یارا صورتی نیلی
قبره گئده جک اُف اولا بو داره خدیجه
دورد نازلی بالالاری قالار دهرده باشسیز
حسرت قالار اطفالی پرستاره، خدیجه
پهلوسی سینار زلف سیاهین غم آغاردار
خم قدّی ویرار دیللره چوخ یاره خدیجه
سنده اوزوی ایله او بحرانه مهیّا
بیر فکر ائله اول لحظۀ خونباره خدیجه
دقت ایلمه صحنده دیدارینه گلسون
دوشسه گوزوی بستر مسماره خدیجه
امکانون اگر اولسا کمک قیل یخیلاندا
دلبندوی بین در و دیواره خدیجه
زهرا بالوی حامله القانه بویالّار
قیل اوندا دعا فاطمه ی زاره خدیجه
گورسون دوتوب اود شعله چکور باب کرامت
جان جان بالا گل عدنده گفتاره خدیجه
احسان ائله زهرایه گوره شعر «صفادن»
فیض حاصل اولا جمله عزاداره خدیجه
- یکشنبه
- 3
- مرداد
- 1400
- ساعت
- 22:36
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه