همای رحمت سبحاندی وجود علی
ثبوت سوره ی قرآنیدی سجود علی
علیدی بنده ی ممتاز حیّ لم یزلی
تانیمادی اونی اِلّا خود ودود علی
معرّف آدینه نهج البلاغه سی بسدی
گر اولماسا دانشان بیر نفر بسود علی
عدالتیله همیشه قضاوت ایلردی
خلافتنده خلاف اولمادی شهود علی
اودور اولنده صدا دوشدی ما سوایه گلون
خلل تاپولدی عدالتّده در نبود علی
رضا دگلدی گرفتار ظلم اولا بیر کس
امیّه اولدی ندن بیلمدیم حسود علی
اجازه ویرمدی ظلّامه اَل فساده آچا
بو کارزارده هیچ اولمادی رکود علی
دوشردی رعشه وجود یلان کفّاره
اولیدی صحنه ی جنگه اگر فرود علی
سبب بودور لقب آلموشدی ضیغم الغزوات
توکوبدی چوخ یره باش ضربه ی عمود علی
تعرّض ایتمگه هیچ کیمده جرئت اولمازدی
رسول اکرمه چوخ نافعیدی بود علی
نبیّ حقّ ایله کی دعوت اولدی معراجه
مشامینه یتشور گوردی عطر و عود علی
یوخیدی مثلی عبادتده زهد و تقواده
دیلینده کلمه ی یا هو اولوب سرود علی
نماز اقامه ایدنده وجودی تترردی
بروز ایدردی حقه عشق بی حدود علی
گدردی دیدینه بی اقربالرون دائم
ایشقلاداردی قرا کلبه نی ورود علی
شکسته حالده گورسیدی بیر صغیری اگر
چیخاردی عرشه اورکدن نوا و دود علی
کفیلدی فقرانون معیشتینه اودور
زبان زد اولدی جهاندا سخا و جود علی
یتیمه قزلارا چوخ چوخ نوازش ایلردی
انیسدی اولارا جمله تار و پود علی
علی مرامده هر کس گلوب جهانه گیده
روان پاکینه حتماً چاتار درود علی
لوای دینه نگهباندی دلیرانه
گوتورمزیدیلر اَل کینه دن عنود علی
او گونکی سجده ده ضربت لنوبدی رأس امام
قبول درگه حقّ اولدی آزمود علی
ویران زمانیده فوراً دوتولدی ضارب حق
گورک نه اولدی اولوم حالدا وانمود علی
بویوردی قاتلیمی ساخلیون آماندا اوغول
کسلمیشیدی ولی طاقت قعود علی
غذا زمانی دیردی غذا ویرون اونادا
اسیروز آج قالا گر سلب اولار غنود علی
او قاتلون عملی بو علی مرامی گورون
روادی دایر اولا بزم یادبود علی؟
حکیم گلدی گوروب زخمی دلغمین اولدی
جهانیدن اوزولوب بیلدیلر قیود علی
نحاله دوشدی الهی حسن حسین او زمان
بلوبله جنّت الاعلایه وار صعود علی
بلالی زینبه قارداشلارین سفارش ایدیب
دیردی آغلاما دای قورتاروب عهود علی
محبّت ایله حسینه آماندی نازینی چک
مواظب اول او ناراحت اولا رقود علی
وصیّت ایلدی بیر عدّه غمکشیده لره
یتشدی موسم هجران دل ربود علی
هم ابن ملجمه راجع دیدی ساغالسام اگر
باغشلارام اولا شرمنده ی خلود علی
و یا من اولسم اگر بیر قلج ویرارسوز اونا
مباد اولدوره سوز خارج از عقود علی
قیام ایدنده قیامت بیلر سن ای مُرتد
علی کیمیدی ندور ارزش وجود علی
مرادون اوغلی عجب شور عالمه سالدی
علی اُولن گجه چوخ خانواده آج قالدی
قاپودا قالدی گوزی چوخلاری اولوب نگران
قولاقلاری قاپودا اگلشوب هامی حیران
دیردیلر آقامیز گلمیور نچه گجه دی
نیه بله اَلی قوینوندا قالمشوق ویلان
گلردی هر نجه پیش آمد ئوز ویریدی اونا
یخوب یره اونی حتماً تصادف دوران
مریض اولمیا یا رب وجودی بسترده
روا دگل اولا ناخوش بو واقعی انسان
نشان اوزینی بیزه ویرمدی سؤال ایتدوک
یتیم لر آتاسی آدین ایلیوردی بیان
گیدوب هارا نه دیک یا نجه سؤال الیک
اوتوروب ایوده اگر گوزلیک دگول آسان
بابا خطاب ایلیردوک الهی بو شخصی
امید روزنه سیدی بیزه او روح روان
حقیقی بیر آتامیزدان بیزه رئوفیدی
الهی درد فراقینده اولمیاق گریان
اگر بلایه دچار ایلیه زمانه اونی
خرابه مسکنمیز تازه دن اولار ویران
یتور بیزه اونی ای خالق شبیر و شبر
ایاقینون سسی گلسه ویرر بو جانلارا جان
زمانه عمرده چوخ کول توکوبدی باشمیزه
اونون وجودینی چوخ گورمسون بیزه سبحان
تصدّق ایله اونون باشینه بو جانمیزی
قوتارسا عمری بیزه ایله ای خدا احسان
خبر واریمدی حسینونده بیر یتیمه قزی
اسیریدی نچه مدّت اولوب خرابه مکان
لحاف و بستری تپراقدی رقیّه آدی
توکردی گوزلری قان یاش مثال قطره چکان
او ناز دانه شیرین دیل بالا چوخ آغلاردی
سالاردی عالم امکانه ناله سی طوفان
دیردی هیچ قیزی یا رب جهاندا خوار ایتمه
چتین تحمّل ایدر دستگیر اولا طفلان
قرا یازوبدی نیه بختمی قضا قلمی
منیم آتامدی اگر شاه عالم امکان
گهی بابا سینی سسلردی گاهی قارداشینی
الین آتاردی قولاقینه ایلیردی فغان
ویروبلا سیلی گوزوم قاندی صورتیم نیلی
نه علّته منی یادّان چیخارتموسان عمو جان
آدیم گلنده بابام شور اشتیاقیندن
آچاردی قولّارین آغوشینه اولام پرّان
یتیم اولا قیز اوشاقی اوزی اسیر و غریب
اوزون تصوّر ایله یوخدی احتیاج بیان
مریضیدی بدنی گتموشیدی تحلیله
دواسی قمچی طبیلیدی زجر بی ایمان
اورگنون باشینی گه قویاردی تپراقه
دیردی عمّه اوتور باشیم اوسته ناله کنان
من آغلیوم سنه سنده ده لایلای منه
بزیم کی حالمیزه یوخدی شامون ایچره یانان
ایاقه دور بالا قزلاری ایله بازرسی
آماندی اولمیا بیزدن سورا داخی اویانان
یاتانمورام قوری یرده یاتاندا خوفلانورام
گلور خیال ایدورم کی سَنان الینده سِنان
منی قوجاقوه آل قولّاروی بوینوما سال
بو آخر عمرده گل قول بویون اولاق بیر آن
شیرین دیلیله دانشدیر منی دیوم سوزومی
عذاره اشکوی توک آغلاما ولی اوجادان
منی باغشلا سنه چوخ اذیّت ایله موشم
جزای خیروی ویرسون خدای عالمیان
نه وقتدورکی "صفا" خادموزدی نوحه یازور
آقا گرکدی اولا نوکرینه پشتیبان
سنی قسم ویرورم من رقیّه نون جانینا
صفایه لطف ایله تا عمری واردی طبع روان
- دوشنبه
- 4
- مرداد
- 1400
- ساعت
- 11:38
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه