اوغول گتیرمیون دوا _ علی هارا دوا هارا
چتین بو یاره دن بالا _ وجودیم عافیت تاپا
نه وار طبیبه حاجتیم _ نه من دوانی ایسترم
ئوزوم طبیب حاذقم _ علوم طبّه دفترم
رسول حقّدن صورا _ هامی جهانه برترم
یقین اراده ایلیوب _ حضورینه گئدم خدا
دیون او بیوه زنلره _ عمومی رجعت ایلسون
محال بیرده بیر نفر _ علینی رؤیت ایلسون
صباح گلیب مراسم _ عزایه شرکت ایلسون
قزیم دینده وای بابا _ اولاردا ایلسون نوا
ائشیتموشم یتیملر _ الینده شیر کاسه سی
گلیبدیلر عیادته _ توکوللر اشک دانه سی
دیولّه وای بابا گلور _ قولاقیمه حزین سسی
اولار ائدنده آه و وا _ باشیمدا آغلیور یارا
یتیر منیم سلامیمی _ یتیمه ، بیوه عورته
دیون حلال ائدون بابام _ علینی گتدی رحمته
باغشلیون اگر سیزی _ سالیبدی رنج و زحمته
اذیتیم اولوب اگر _ باغشلاسونلار آللّها
بش ایل خلافت ایلدیم _ کمال داد و عدلده
رضای حقّی گوزلدیم _ مقام نصب و عزلده
نفاقی ریشه کن ائدیب _ تلاشیم اولدی وصلده
یالان قضاوت ائتمدیم_نه اولدی ایشلریم ریا
محوّل ایلدیم سنه _ امور مسلمینی من
منیم تمامه خدمتیم _ یتوبدی واقفم علن
مواظب اول حسینیمه _ سفارش ایلورم حسن
محبّت ایله زینبه _ سیزه آتوز اولا فدا
دئسم اونون مصیبتین _ جبال دهری آب ائدر
ویرار اود آشنالره _ اورکلری کباب ائدر
یانار شرار محنته _ مصیبتوزده تاب ائدر
سالار سنونده قارُوی _ باجون جهاندا برملا
آنوز بتوله اوخشیوب _ باشی بلالی زینبیم
ئولونجه بو زمانه ده _ اولار عزالی زینبیم
گئدر مزاره بینوا _ اورک یارالی زینبیم
اونا آتاسی مرتضی _ بهشتده دوتار عزا
حسینیمله وار اونون _ بویوک قرار نهضتی
او نهضتیله شیعه مون _ گلر اله شفاعتی
آچار بلالی زینبیم _ محبّه باب حاجتی
اگر چی مین مصیبته _ اولار همیشه مبتلا
توسّل ایله زینبه _ اورکدن اولسا حاجتون
ولی فراهم ایلسون _ زمینه نی فراستون
صورا خلوص نیّتون _ گوزون یاشی سماجتون
نهانی دردوی سوله _ خانیمدا ایلسون روا
منه بو بسدی عشقینه _ مدام عادت ائتموشم
هایاندا گورموشم علم _ ویروبلا فوری گیتموشم
گل وصاله خار اولوب _ ایاقی آلتدا بیتموشم
تمام اهل دل تانور _ لقب وئریبدیلر "صفا"
- دوشنبه
- 4
- مرداد
- 1400
- ساعت
- 11:40
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه