گلون نوایه حسن قلبی داغلانان گئجه دی
ئولوب آتاسی علی یاسی باشلانان گئجه دی
نجه آتیدی هامی شیعه نون پناهیدی
پناهمیز قاپوسی ایندی باغلانان گئجه دی
یتیم اولوبدی حسین بن فاطمه بو گئجه
باجیسی باشه عزا قاره سی سالان گئجه دی
بو گون گرک حسنینون شریک اولاق غمینه
نه چون آتالاری قبر ایچره تک یاتان گئجه دی
یقین گلوبدی امام زماندا قان آغلار
ال انتقامه آچا حقّه یالواران گئجه دی
لیال قدرده هر ایل شهید محرابه
عزا دوتار ئوزی ئوز جدّینه همان گئجه دی
فنا جهانی علی ترک ائدیب باشیندا یارا
ولایت اهلی شرار غمه یانان گئجه دی
سولوبدی غمدن الهی محمّدی گُللر
فلک او گللری بی باغبان قویان گئجه دی
گرک سسین قوشا هر شیعه زینبین سسینه
امامتون گُلی چون فتنه دن سولان گئجه دی
شهید اولوبدی علی شدّت عدالتدن
سالان محبّلرین درده بو گران گئجه دی
بو گئجه نالیه ارواح انبیاده گلیب
عذاره گوز یاشی سیلاب تک آخان گئجه دی
دیوردی فاطمه جنّتده وای عم اوغلوم وای
نبیّ اکرمله با هم آغلاشان گئجه دی
حسن دیوردی نه نه هارداسان بابام ئولدی
شرار هجره یانان دورد غم آشیان گئجه دی
بابام خلیفه اولا امّته دگولدی رضا
آلوبدی حسن عمل مزدینه یامان گئجه دی
صداقتون بویوموش بو جهاندا مزدی اگر
فغان عدالته بیداده نغمه خوان گئجه دی
گرک بو کوفه نون اهلی جهاندا خوار اولسون
اسیر پنجه ی بیداد روزگار اولسون
دیور امام حسن یادگار شیر خدا
وصیتینده بابام ایلیوب منه افشا
بو اهل کوفه نون افسوس یوخدی ایمانی
نه ئوزلرینده وفا وار نه دیللرینده صفا
اوغول حسن سنیده غصّه لر رها ائتمز
سنونده وار باشوون غملی ماجراسی بالا
نئجه دیوم سنه ئوز محرمون خیانت ائدر
وفاسیز عورته لعنت اولا صباح و مسا
حسینمون ولی سندن مصیبتی چوخ اولار
اونون ئوزین بالالارین ائدولّه غرق بلا
زمان کچیب دولانار آشکار اولار بیر گون
دچار ائدر بالامی مین بلایه دست قضا
یازار حضورینه مینلرجه نامه کوفه لیلر
ائدولّه دعوت اونی کربلایه قوم دغا
ئوزین جلای وطن ایلیور همین امّت
باشیندا عترت اطهاری دیللرینده دعا
محرّمون اونی قلب الاسدده جمعه گونی
او گوندی ثبت اولونوب آدی روز عاشورا
سوسوز کسلّه حسینون باشین فرات اوسته
آلار لقب اودی معناده سیّد شهدا
آخان قانیلا آلار دستماز مقتلده
همان او قاندی ائدر لا علاج درده دوا
چاغیرسا صدقیله هر کیم بالامی امداده
وئرر جوابین حسینیم شفیع روز جزا
بالام حسینه کیمون اولسا دیلده اخلاصی
یقیندی حول جهنّمدن ائتمسون پروا
ز بس چوخ ایستور حسینی خدای عزّ و جلّ
اونون مُحبّینه محشرده وار امید عطا
خجالت ائتمیه جک اوغلمون عزا دارین
ئوزی بو قولی وئریب شیعیانه ذات خدا
حسین یازاندا سنه نوحه دائم آغلاموشام
کرم قیل اولمیا شرمنده درگهونده "صفا"
- دوشنبه
- 4
- مرداد
- 1400
- ساعت
- 11:43
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه