دور فکر ائله بیر زینب نالانوه قارداش
باشسیز قالان اطفال پریشانوه قارداش
بیر نصفی یانان چادره یغمیش بیزی اعدا
غم بزمی سنه ایلمشوک خیمه ده برپا
شرکت ایلیوب شام غریبانوه زهرا
اوخشار سنی اولسون قسم اوز جانوه قارداش
بیر گوشه ده لیلا اوتوروب اکبرین اوخشار
ال سینه ده بیچاره رباب اصغرین اوخشار
کلثومده عباس کیمین یاورین اوخشار
منده یانورام آتش هجرانوه قارداش
بستر ایدیب آهو بره لر تیره ترابی
بالشلری ئوز اللّری تپراقدور حجابی
بیر قولّارینون یوخدی هله بند و طنابی
نیلر گوروم آللّه بو عزیزانوه قارداش
نی تک بو اوشاقلار هره بیر یرده سیزیلدار
یوزلر گوه ریب قولاری نیلوفره اوخشار
بیر بیرلرین آغوشه چکیبلر بالا قزلار
لای لای دیرم بیر سوری جیرانوه قارداش
سندن نگرانم ولی نیلوم ندی چاره
عاشقدی بیلورسن گوله خلقتده هزاره
چکدی سنون عشقون منی آخر بو دیاره
قربان یارالی نعشوه پیمانوه قارداش
بو خرداجا چادر بیزه شدّتله قوروخدی
هیچ کیم اوجادان آغلاماقا جرئتی یوخدی
گوندوز قاچا قاچدان ایاقی یاره لی چوخدی
وار حاجتمیز مرحم و درمانوه قارداش
زینب سنه بو چولده دوتوب شام غریبان
جمع ایلموشم دوره مه اطفالوی گریان
ایلوب بو شیرین دیللی رقیّون اوره گیم قان
بیلمم نه دیوم بلبل خوشخوانوه قارداش
گاه اصغره لای لای سولیور نازلی رقیّه
گاهی دیوری گتدی هارا بس بابام عمّه
بیر کافر اویاندان گوروسن سسلدی دینمّه
اوندا ال آتار باجوی دامانوه قارداش
هر قیز اوشاقی یاتماسا آغوشیمه آلّام
نازین چکرم بستر مهره اونی سالّام
تا یوخلامینجا او دل افکاریله قالّام
عاملدی ئولونجه باجی فرمانوه قارداش
بیر شمعیدی بیر خیمه دی بیر عدّه سیه پوش
قویماز آچا خفّت بیزه بو دهرده آغوش
خون علوی تا شریانیمده ایدر جوش
تاج شرفم درگه و دربانوه قارداش
ای سرور و سالار شهیدان طریقت
حق اوسته ویرن جانینی سنلندی حقیقت
لطف ایله "صفا" طبعینه ویرسون ایله زینت
شعری سالا آی شعله سی کیوانوه قارداش
- دوشنبه
- 4
- مرداد
- 1400
- ساعت
- 21:11
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه