چون قدم قویدون بو دشت کربلایه زینبا
گئت اوزون ایله مهیا سن بلایه زینبا
بو یره حسرت چکور اُول وادی ایمن باجی
عاقبت قارداشیوه خاکی اولار مدفن باجی
سن ائدرسن شامی من بو توپراقی مسکن باجی
روز ازّل وئرمیشوخ سوز کبریایه زینبا
بو بلالی چولده افسرده ائده لّر حالیمی
سندراللار ای باجی ظلمیله پرّ و بالیمی
چوخ زمان گئچمز ائده لّر جاری اشک آلیمی
گوزلریم حسرت قالار آل عبایه زینبا
گرچه سن زهرا کیمی بانوی اعظمسن باجی
لیک بو چولده منه هم راز و همدمسن باجی
من گرک آگاه ائدم اسراره ، محرمسن باجی
صبر ایله دلدن رضا اول هر قضایه زینبا
اکبریم بو چولده زینب قانینه غلطان اولار
اصغریم اما دچار ناوک پیکان اولار
قارداشیم عباسه ده نهر اوسته بیر طوفان اولار
باشی ظلمیله گئدر نوک جدایه زینبا
ال تاپار آل رسوله فرقه سفیانیان
خاندان مصطفانی ایلیر بی خانمان
کوفه ده فرمان یازوبلار قتلیمه ، بو کوفیان
ئولدوروب بیر اود ساللار کربلایه زینبا
مقتل ایچره شمری گورسن چون توکور گوزیاشمی
خنجره آتما الون گوزله کسنده باشمی
یاندیرار آخر بو غمده باجی آل هاشمی
بیرده یالوارما او شمر بی حیایه زینبا
غارت اخیامیده زینب اولار بیر کشمکش
قیزلاریمدان اوج ائدر عرشه صدای العطش
جان وئرر اول حالیده مخیمده بیر جوت غنچه وش
ظلم اولار بو چولده آل مصطفایه زینبا
بیرده « شیدا » یه نظر ایله یازاندا خامه سی
حشریده تائید اولا لطفیله بلکه نامه سی
گرچه واردور اول چتین گونده بویوک هنگامه سی
لطف ایله قویما گله آه و نوایه زینبا
- جمعه
- 8
- مرداد
- 1400
- ساعت
- 11:14
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه