سماده اول مه تابان علیدور
اورکلرده اولان ایمان علیدور
تمام معنیه قران علیدور
وفا گلزارینه ریحان علیدور
امام شیعیان یاران علیدور
بیلون مولود بو اقا بو گوندی
سئوینمیش حضرت طاهابوگوندی
ائدنده فخر حقه یکتا بو گوندی
اولوب خار دشمن و اعدا بوگوندی
ابی طالب گلی الان علیدور
ترک گوتدی او گون دیوار کعبه
جلا تاپدی بوتون پرگار کعبه
هله فاش اولمویوب اسرار کعبه
گلوب دنیایه تا سردار کعبه
آدین جبریل دیدی ای جان ،علیدور
ئوز عشقیندن علی آد قویدی داور
که عشق اهلی اونا دائم مفخّر
یوزون ئوپدی باسوب اغوشه مادر
که یعنی خوش گلوبسن ای دلاور
بو دنیایه فقط سلطان علیدور
علی یعنی شجاعت یعنی غیرت
علی یعنی آدی عدل و عدالت
علینن اولدی آغاز امامت
علی عرشه خدایه وئردی زینت
گجه لر اول مه رخشان علیدور
علیدور ملک دیللر پادشاهی
علیدور زر ائدور مسکینه کاهی
علیدور بیکس انسانلار پناهی
چاغیر سائل علینی گاه و گاهی
دواسیز دردلره درمان علیدور
اولوب حک یاعلی آدی اورکده
قالار تا روز حشر یادی اورکده
طنین اندازدی میلادی اورکده
نه خوشدور یاد و فریادی اورکده
تمام اشعاریده عنوان علیدور
علی اولدی یتیمانین اتاسی
علینون دوز چورک اولدی غذاسی
علیدور شاه و مسکینلر اقاسی
علیدن دویمارام الله رضاسی
"خدایی" یاز شه خوبان علیدور
- شنبه
- 16
- مرداد
- 1400
- ساعت
- 23:18
- نوشته شده توسط
- یوسف اکبری
- شاعر:
-
حسین خدایی زنجانی
ارسال دیدگاه