فرزند سرافراز امام حسنم من
صحرای مواساتیده یا هو دینم من
جان بذلینه میدانه زره سیز گئدنم من
یوخ ئولمگه قلبمده اباء عاشقم عاشق
من بنده فرمان خداوند شکورم
آز سنیله داغلار بوئی آلامه صبورم
مصداق اذالشمس ام و باشدان باشا نورم
سینمدن آلور آیدا جلا، عاشقم عاشق
غیرت تانینوب جدیم علینون بیلگیندن
کفرون پوزولوب لشکری یاهو دئمگیندن
من کسب وقار ائتدیم حسینون اتگیندن
تاپدی هدفیم قدر و بها ، عاشقم عاشق
حق لشگرینون افسر خوش منصبی ام من
عزت یولینون سالک عطشان لبی ام من
فخر ایلیورم ، حیدری ام ،زینبی ام من
شیریندی منه شهد بلا عاشقم عاشق
آز عمریمی ویردیم باشا عزت قاپوسیندا
روحیم پر عشق آچدی سیادت قاپوسیندا
نفسیم ابدا گزمه دی ذلت قاپوسیندا
فخر ایلر آدیمدان صلحا عاشقم عاشق
هر بیر نفسه جان دیرم دلبره قربان
ناقابل اولان باش قوجالان رهبره قربان
خوشدور بلشوب قانه اولام اکبره قربان
شمشیره ائدم ناز و ادا عاشقم عاشق
لبیک دیوب رهبریمه کئچدیم ئوزومدن
شانیم تاننار دهر فناده بو سوزومدن
من عزم جهاد ائتدیم امام ئوپدی گوزومدن
هی باخدی منه ائتدی دعا عاشقم عاشق
- چهارشنبه
- 20
- مرداد
- 1400
- ساعت
- 20:57
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه