ای دل بو فنا دهره چوخ آلانما آماندور
سیماسی فریبنده آدین چکمه یاماندور
درمان ایلمز درده ولی دردی کلاندور
بی رحم دی هر وردیگین آخر آلاجاقدور
تنها بو یالان دنیادا بیر آد قالاجاقدور
عمرین چاپاراق مرکبی بیر گون دوراجاقدور
بیر گون ملک الموت سنه تور قوراجاقدور
آخر بو حیات گلشنی نی سولدوراجاقدور
الدن نَقَدر ثروتون اولسا آتاجاقسان
قدونجه قرا تپراقین آتدا یاتاجاقسان
بیر گون آنادان اولما کیمی گَل ها گَلون وار
بیر گون گدیشون وار قباقیندا اجلون وار
منکر ملکی گورسه الونده عملون وار
دوزدور سنه اول گجه مهمان اولاجاقدور
قبرون ولی بیر عمر گلستان اولاجاقدور
احسان ایلسه دهریده هر وارلی واریندان
یوخسولدا گیدوب آشماز اونون دام دواریندان
آسوده یاتار قونشوسونون آه و زاریندان
قونشی گرک ارثیه سی نی قونشودان آلسین
بو عرف ده یوخدور بیری اُلسین بیری قالسین
بیر عده یاشیل یاپراق ایچینده یاشاییلار
بیر عده گجه غصه گونوز غم داشاییلار
بیر عده دوشوبلر علنی یوز قاشاییلار
بیر یاندا فقط حیله فیریلداق دی یالاندی
بیر یاندا چالیب چاپما اوغورلوقدی تالاندی
- جمعه
- 22
- مرداد
- 1400
- ساعت
- 13:34
- نوشته شده توسط
- یوسف اکبری
ارسال دیدگاه