جانیم آنا گوزوم آنا آی آنا
بو دنیادا کیمدی سنه تای آنا
اوشاقلقدان قولاقیمدا سسلنور
منه چالدیقلارون او لایلای آنا
یادیمدادور اوخویاردون من ایچون
بهار نغمه لرین یاز نغمه لرین
قوجاقوندا شیرین لایلای دیماقون
اورگدردی منه ناز نغمه لرین
ایندی فکر و خیال منی آپاریر
اورگیمده چالور ساز نغمه لرین
اسورم جوشورام دیورم حییف
گچن گونوم اله دوشمز دای آنا
او بلبلون قاناد چالان یریدور
قزل گلون تیکانلی قول بوداقی
تیکانلی اولسادا محبتی وار
آزادلیق ایستیور او اویناماقی
اوشاقلارا بهشتیلن یاریدور
آتار وارکن آناسینین قوجاقی
آناسیزلار بولر نییمیش آنا
گجه لر گونوزلر دییر وای آنا
بجردیگون ایگیت اوغول قوجالیب
اوشاقلقی دوشوب گینه یادینا
قارلی داغلار کیمی باشین قار آلوب
قوجامان دیوللر ایندی آدینا
بیر کفن گوتوروب دوزه لوب یولا
بطلان خطی وروب هر بیر زادینا
فلک سایدیقنی سایوب من ایچون
شیرین دلیم اویان سنده سای آنا
گچن گونه چتیندی گون یته دای
ورقلنوب جوانلقین کتابی
هانی او نغمه لر هانی او لایلای
ایندی گلور اله اونون حسابی
نه قشی یاتاردی نه یاز نه ده یای
پهلوان اوغلیون قالمیوب تابی
داغلاری یریندن گوتورن اوغلون
گوتورنمور بیر استکان چای آنا
هیچ بولمورم نه دانشیم نه دیوم
خاطره لر اورگیمده دولانور
اوشاقلقم جوانلقیم یادیما
دوشن کیمی گوز بولاقیم سولانور
آغلایرام آغلایرام یانورام
کدرلی اود قباقیمدا قالانور
سسلنورم داغا داشا دنیزه
های سالورام یوخدی ورن های آنا
یادیمدادور آتام مینوب آتینی
قویون قوزی ملور گزور اوبانی
فلکین چرخی تک زمان دولانوب
آلوب الیمزدن آتا بابانی
داغلارین باشینی دومان بوریوب
گورنمورم داخی او خان چوبانی
بیر ایله سورودن یاغدان کره دن
گتورن یوخ ایندی بیزه پای آنا
گچن کاروانلاری گچن ایللری
تاپورام اونلاردان سوروشام سنی
بیری دیور داخی گلمز او بیرسی
بیر آیری سوز دیور آللادیر منی
کسورم یوللاری دوشرگه لری
تانیام بیر به بیر گلوب گیدنی
"امینی" گوزلیور گونش جمالون
قرانلیق اولکمه گلوب یای آنا
- یکشنبه
- 24
- مرداد
- 1400
- ساعت
- 11:43
- نوشته شده توسط
- یوسف اکبری
ارسال دیدگاه