الله نظرون بیرده دولاندور منه ساری
قوی چشمهٔ طبعیم جوشوب اولسون گینه جاری
بیر بیل گوتوروم شعر و ادب مزرعه سینده
وَریان چووروم کردیلر ایچسین او سولاری
طبعیم گلی جداً سوسوزوندان قوریبدور
لطف ایله یاغیش گوندر اقلاً دولا باری
دریالره سیللر توکولور قات به قات ایلور
بیر قطره سی بولمم نیه گلمور منه ساری
سالدیردی یازیخ بلبلی آهن قفس ایچره
گلشنده داداندیردی طبیعت گله خاری
قادرسن اوزون قدرت مافوق واریندور
قدرتده سنه بیر احدین یوخدی چخاری
لطفین کرمین رحمتین انباری بیوکدور
قورتولماز اونی حمل ایده مین باری سواری
محتاجم الهی منی نومید یاشاتما
عالم آپاریر بندیه ده گوندر او واری
ورسنده سنه بنده یم آلساندا الهی
یوخ فرقی دوشم چاهه گیدم یا که یوخاری
سنّیم چوخالور عمر آزالور گلدی گیدر وار
باشیم که اولور آغ سارالیر عمر بهاری
من عاشق جان بر کفم ای سوگلی معشوق
اوّلدن ایله آختاریرام سن کیمی یاری
حاصل بو یاشایش دا نه الدوم نه دیریلدیم
عالملر آپاردی کیفی قالدی منه زاری
طوفانلی دنیزلرده گیچور گونلریم الله
مندن اشیدن یوخدی بو فریاد و هواری
صبرین گَمی سیندن باخرام ساحله نیلوم
سالدون جانیما بیر بو قدر ماهی و ماری
دشت و دمن و کوه و بیاباندا دومان وار
چوخدان بو دومانلق بوریوب گوشه کناری
گوندوز گونه حسرتدی بو گوزلر آیا آخشام
آخشام کیمی گوندوزده اولور تیره و تاری
امیدیمیلن صبریمی سن کسمه اوزوندن
منده سنیلن باغلامشام قول و قراری
جان آلماق ایچون تا ملک الموت گلینجه
هر ثانیه هر لحظه ایدم شکرگزاری
چون سایه سنیندور سنه همسایه اولاندان
پیس یاخشی گینه ساخلامشام وقر و وقاری
گوزدن یاشیمی توک ولی یوزدن سویی توکمه
یوزدن که گیدور سو گترور انسانا خواری
عقلین گوجی هرکیم ده اوزون ورسه بروزه
قویماز یخلا یا داغلا وارلیق حصاری
وارلیق دیمورم پول دی ریاست دی مقام دی
دنیا مالی ثروت دی که بیزدنده فراری
آت سیللر آپارسین بشره فایده ورمز
وارلیق که جهنم ده خموش ایتمیه ناری
قیلماز بشرین دردینه درمان ایله وارلیق
بیر جین بوغاناق مثلی دی وار گرد و غباری
وارلیق اودی جنت ده گوزل قصر لر آلسین
یا جنته دوندرسین او تاریک مزاری
شیطان چالیشیر انصاف و ایمانی آپارسین
ایمان که داغلدی داغیدار دار و نداری
ایمانیله انصافیله وجدان اوچی بیردی
تشبیهاًاولور باری سواری صورا گاری
گرچه بو کچیک منطقه ده گوشه نشینم
لکن گزورم آیری بیر عرفانلی دیاری
شهرینده غریب اولسا دا اولسون بو "امینی"
یوخ عیبی خدایی دی اوزی شعری شعاری
- یکشنبه
- 24
- مرداد
- 1400
- ساعت
- 14:35
- نوشته شده توسط
- یوسف اکبری
ارسال دیدگاه