سمند فانیه ای سوگلیم سعی ایت سوار اولما
دوش عاقللر صفینده سیر قیل دیوانه وار اولما
کنار ایلر مسیروندن سنی بو چرخ کج پندار
آییخ گَز تا گرفتار فریب روزگار اولما
فلات زندگی ده پیچ و خم آلچاق اوجا چوخدور
بویان دریا اویان داغ داش دره هموار یول یوخدور
فریبا دنیانین سینمیش الینده گورسنن اوخ دور
او تیراندازیدن گیزلَن که اوخلاره دچار اولما
ایوینده یاریلن دور یات دولان اغیاره یول ورمه
که قوی بلبل دولانسین گلسِتاندا ساره یول ورمه
قزل گل بَسله ورسین گل گلابین خاره یول ورمه
حیا و حرمتون قالسین الونده شرمسار اولما
کلیم اول طور سیناده دوشَن راز و نیاز ایله
مناجاتون قوتاردون باشلا تبلیغ نماز ایله
غنی سن قالما غفلتده دولان رفع نیاز ایله
خدای مهربانه بنده اول بی بند و بار اولما
بو سوز مندن سنه سندنده خلقه عرض و حال اولسون
مُصاحب تاپ دوز اولسون دوزلی اولسون با کمال اولسون
گیینسین معرفت پیراهنین صاحب جلال اولسون
گیدوب نا آشنا نا کس لریلن همقطار اولما
غرض نامرد آداملان یولداش اولما اوردا یا بوردا
قاچار نامرد آدام یول یولداشین اما ورَر قوردا
سسون قویماز اوجالسین ساخلیار پنهاندا سانسوردا
تیکان چاتسین یاراندان یاغی لر چوخ انتظار اولما
عقیل اول باشیوی بیهوده دنیاده دولاندیرما
گچیردوب اوز اوتون اوزگه اجاقین بیله یاندیرما
ایلون وار طایفه ن وار قوم و خویشین وار اوتاندیرما
آمان گوندور که ننگ قوم و خویش و ایل و تبار اولما
خدا ، عاقل یارالداندا یارالدیب نسل انسانی
آیرسینلار دییبدور بیربیریندن کفر و ایمانی
چالیشدیرماق نه لازم دور مسیحا و مسلمانی
باشارسان مصلح اول بنیانگذار کارزار اولما
تعارف سیز نصیحت دور اوزوم سن یاخشی انسان اول
شریف اول با شرافت اهل قرآن اول مسلمان اول
مسلمان اول مسلمانلار ایچینده اهل ایمان اول
شراب سلسبیل ایچ اول خمار اهل قمار اولما
باشون چیگنینده یان دورما اگیلمه هر گَلن پَسته
قالار بدنام آدون دنیاده اولسان پَسته وابسته
اوزون اوز یاریویله گَز دولان آهسته آهسته
غیور اول باشعور اول شاهباز اول بی بخار اولما
صفات احسنت لن باخ بو خلقین یاخشی سین دیندیر
حلالیله حرامین دوت نظرده جانیوه سیندیر
نه شور اولسون نه چوخ شیرین نه
مین نه بوینوا میندیر
کُبار اول افتخار اول باوقار اول بی وقار اولما
حریم عصمت اسلامی ده اسلامی سیرتیلماز
حیانین پرده سی هیچ بیر مسلمانیله یرتیلماز
او کافردور، مسلمانه مسلمان افترا قیلماز
اوزوم ای من اوزوم گوزله گوزَتله عیب دار اولما
آماندور اصلیوی اصلان کیمی دوت بداصیل اولما
یامانلیق باغلاما اوز آدیوه اصلاً بخیل اولما
نجیب اول نانجیب ناکس لره هرگز دخیل اولما
کفیل اول کس لره ، ناکس لره یوخ اعتبار اولما
پیام دلنشین ذات یکتا واردی قرآندا
عیوب مردمی هرگاه گوردون ساخلا پنهاندا
الوندن گَلسه قیتَر ، توپ کیمی اویناتما میداندا
تحمل ایله صبر ایله صبور اول بی قرار اولما
گیدرسن غفلته یومما گوزون بیدار قال یاتما
ابوسفیانلارین مثلی گلوم دیناره دین ساتما
گولوب شیطانیلن باهم اولوب انسانی آغلاتما
سویندیر خلقی خلاقین یانیندا اشکبار اولما
"امینی" خامه دن چک ال قوی اشعارون تمام اولسون
تمام ائللردی آیلاردی یازیرسان صبح و شام اولسون
گرکدور سوز چورک مثلی نه چوخ یانسین نه خام اولسون
اگر دوز پیشمه سه شعرون بوراخ صاحب شعار اولما
- یکشنبه
- 24
- مرداد
- 1400
- ساعت
- 14:38
- نوشته شده توسط
- یوسف اکبری
ارسال دیدگاه