ای یگانه مظهرِ عدل و عدالت یاعلی
معنی تقوا و تندیسِ دیانت یاعلی
کعبه دن چخدون سن ای خورشید رخشانِ ولا
فیضِ یاب اولدی قدومونله سنون بیت ِخدا
زادگاهون عشقیله ایلر طواف اهلِ ولا
کعبه سنله تاپدی عزّت در حقیقت یاعلی
علّت ِایجادِ خلقتدور وجود ِ مصطفی'
احمدِ محموده خاطر خلق اولوب ارض و سما
ذاتِ پاکوندان اوتور خلق اولدی ختمُ الاَنبیا
علتِ ایجاده اولدون مطلق علّت یاعلی
کیمده وار سنده اولان شأن و جلال و احتشام؟
جز رسول الله یوخ اوزگه انبیاده بو مقام
حجّتِ حق ، وارث ِختم پیمبر ، هم امام
ایستدی حق باشلانا سنله امامت یاعلی
یاعلی ای مادحون ذات ِخدای کردگار
وَه نه خوشدور یاری تعریف ایلیه عالمده یار
لا فتا الّا علی لا سیف الّا ذوالفقار
در حقیقت سنده ختم اولدی شجاعت یاعلی
ای هامی ذرّات ِعالمده وجودی منجلی
هیکلِ توحید و عین الله ، الی الله الی
مهر و ماه و انجم و افلاک با صوتِ جلی
سنن ایستولّر همیشه استعانت یاعلی
مشگله دوشسه سنی سسلر تمامِ کاینات
سسلدی نوحِ نبی گردابدن ویردون نجات
خضره ویردون یاعلی ظلماتیده آبِ حیات
ای سنه مدیون آدم، آدمیَّت یاعلی
وصفوه عاجزدی عقل و وهم و ادراک و بیان
نه بولور ذرّه ، ندور خورشید ِرخشانِ جهان
شاهِ مردان شیر ِیزدان لنگرِ کون و مکان
مثل و مانندون گورنمز چشمِ خلقت یاعلی
اولمیوب اولماز میّسر بیر کسه بو افتخار
تک سنه مخصوصدور ای حجّت ِپروردگار
کعبه ده دنیایه گلدون ای ولیّ کردگار
مسجد ایچره تاپموسان فیض ِشهادت یاعلی
یومِ خندق کفریله اسلام اولاندا روبرو
کبریله عَمر ایلین وقته مبارز جستجو
باتدی سسلر سن ولی اسلامه ویردین آبرو
ایستدون ختمِ نبی دن جنگه رخصت یاعلی
ویرمدی رخصت حبیبِ حضرتِ پروردگار
امتحان وقتی تانونسون بلکه اغیاریله یار
چوخلاری دوشموشدی بو فکره کی ایتسونلر فرار
ویردون اهل دینه درسِ استقامت یاعلی
حاصل آلدون جنگه رخصت عزم ِمیدان ایلدون
عشقوه عشّاقِ دهری غرقِ حیران ایلدون
یک تنه اردوی کفر و شرکی لرزان ایلدون
لشگر ِاِلحاد و کفری دوتدی وحشت یاعلی
یاعلی قرآنِ منزلده خدای ذوالجلال
هل اتی' نازل ایدوب شأنونده یوخ جای مقال
آشکارا حقّوی افسوس قومِ بدمَآل
داندی سنله ایلدی بیجا عدوات یاعلی
بی وفالر خانهء ایمانی ویران ایلدی
گون بولود آتدا قالوب ، خفّاش جولان ایلدی
ظلمه باخ ، دین سیز اولان تفسیرِ قرآن ایلدی
سنده باخدون دوزدون ای صاحب خلافت یاعلی
بعدِ پیغمبر عجب امّت اویانماز یاتدیلار
قیدِ دین و عزّتِ اسلامی باشدان آتدیلار
پیروانِ نفسِ امّاره مرامه چاتدیلار
ایتدیلر قرآن و دینه چوخ خیانت یاعلی
نه خیانت نه جسارت نه جنایت نه جفا
نه خدادن ایتدیلر ، نه روحِ طاهادن حیا
بابِ زهرایه هجوم ایتدی گروهِ اشقیا
سسلدی ثانی گَل ایت بو شخصه بیعت یاعلی
کینهء دیرینه سین ایتدی او ناکس آشکار
بیعتی عنوان ایدوبدور ثانی بی شرم و عار
هم قاپون یاندوردی ، هم زهرانی ایتدی زخمدار
نه یارا ، مرگِ بتوله اولدی علّت یاعلی
نه یارا؟ دوشدی ایاقدان اولدی زهرا بستری
آز زماندا سولدوروب ریحانهء پیغمبری
یوزده سیلی ، قولّاریندا تازیانه یرلری
سینه ده هر لحظه یاره تاپدی شدّت یاعلی
وار یقینیم ذَرّیه لطفیله باخسا بوتراب
ذرّهء ناچیز عروج ایلر گویه چون آفتاب
فخر ایدر دریای لطفونده (پرند) اولسا حباب
هر ایکی دنیاسینه ایلر کفایت یاعلی
- دوشنبه
- 8
- شهریور
- 1400
- ساعت
- 15:6
- نوشته شده توسط
- یوسف اکبری
- شاعر:
-
حاج محمد پرند
ارسال دیدگاه