یاتما قوری یرلرده ای پشت و پناهی زینبون
دور گور دویوللر بیر بئله، وار نه گناهی زینبون
من ببر غریب بی کسم، تیر بلا آماجیم
قارداشلاری الدن گیدن، بیر داغدیده باجیم
بیدادگردور دشمنیم، داده یتن محتاجیم
بی دادخواهم، داده یت ای دادخواهی زینبون
بیر یاندان افلاکه چخور اشرار الیندن شیونیم
ببر یاندان ایلور باشیمه قمچی حواله دشمنیم
بیر یاندان ای روحیم، قالوب اطفال الینده دامنیم
بو کش مکشده بیر نفر یوخدور پناهی زینبون
بیر گون دوزردیم دورمه بیر گلستان گل من حسین
هر بیر گلیمدن باشیدون گللر ایچینده سن حسین
بیر نوع تاراج ایلدی گلزاریمی دشمن حسین
بیر گلستاندان قالمادی بند گیاهی زینبون
بسکه قوری نی تک چیخار هر بندبندیمدن نوا
نی تک نوائیله دولوب قارداش دیار نینوا
قرخ مین نفر وحشی عرب ، من بیر اسیر بینوا
ایتمور مخالف لشگره، تاثیر آهی زینبون
بیر کس دیمور بو لشگره بو بی پناهی ویرمیون
یوخ یدی قارداشدان قالان بیر دادخواهی ویرمیون
اینجتمیون زهرا قیزین یوخدور گناهی ویرمیون
بسدور دوتوبدور قلبی تک اود خیمه گاهی زینبون
کول باشیمه قارداش باشون کیم ایلیوب تندن جدا؟
جسمون منا قربانی تک، یکسر سویوبلار اشقیا
بیر کهنه کوینگده سنه قویموب قالا اهل جفا
آرامینی الدن آلوب، حزن و دواهی زینبون
قلبیم کیمی یاندوردولار بو دشتیده خرگاهیمی
شاهانه بیر چتر ایتدیلر باش اوسته دود آهیمی
آل امیه ویردیلر تاراجه عز و جاهیمی
بدر انتقامین آلدیلار ای قبله گاهی زینبون
شمع فراقونده یانوب پروانه تک بال و پریم
پروانه عشقم ندور پروا، اود آلسا شهپریم
شامه قطاریم یولانور، قانلی باشوندور رهبریم
سنسن شب ظلماتده تابنده ماهی زینبون
طوفان ایدوبدور گوز یاشیم، دشتی گوزوم دریا گورور
روشن گونی بختیم کیمی چشمیم شب یلدا گورور
ال دور بدندور دوغرانوب، صد چاک اولان اعضا گورور
بو چولده هر سمته دوشور قارداش نگاهی زینبون
نه یوزدی، نه مین، درد دل، تا تک به تک تعداد ایدیم
اوچ شعبه پیکاندان دیوم یا زخم حلقون یاد ایدیم؟
یا نهب و غارتدن دیوم؟ صبرین ایوین برباد ایدوم
بیر بحر بی پایاندی غم، اول بحره ماهی زینبون
عطشان قفادن ذبح ایدوب شمر ستم پرور سرون
آتلار ایاقی ایلیوب خاکیله یکسان پیکرون
چوخ بی مروتدور کسوب اوز ساربانون اللرون
گه باشوه آغلار، یانار بو جسمه گاهی زینبون
جسمون سنون بی نقصدور ای خامس آل عبا
ایمدی نقیصه گورسنور، وار بلمورم نه ماجرا؟
بیر الده وار دورت بارماقون، نولموش بیری وا کربتا
وار حقی گوزدن دامنه آخسون میاهی زینبون
بو قانلی تربتدن گلور عطر بهشتی برملا
زهرا آنامین عطریدور یا عنبر چین و ختا؟
یوخ یوخ گجه دیداروه گلمیش یقین خیرالنساء
بو عطر آنامین عطریدور یوخ اشتباهی زینبون
بو بی وفا دنیا سنی ایلوب (حسینی) تلخکام
وار حاجتون دلده عطا ایتمور خدای لاینام
بو زینبون دامانینه صدقیله ایتسن اعتصام
لطف و عنایتیله عطا ایلر الهی زینبون
- دوشنبه
- 8
- شهریور
- 1400
- ساعت
- 22:32
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه