دوشدی نجه لیلا گوزی مژگانه پوزولدی
اکبر باشینا شانه وروب شانه پوزلدی
افسون ائلیوب لیلینی افسانه مثالی
مژگانیله زلفین دارادی شانه مثالی
تولاندی اوغول باشینه پروانه مثالی
شمع شعله چکوب یاندی او پروانه پوزولدی
اکبر ائله عشق عالمینه غوطه ور اولدی
جان الده گلوب مقتله چوخ شور و شر اولدی
شمشیر شرر باریله شقّ القمر اولدی
پیمانه وئروب صاحب پیمانه پوزولدی
قاسم نجه درک ایلدی پیمانِ الستی
فوراً یتیشه محضر دلداره تلسدی
اولدی میِ عرفانون ائله عاشقِ مستی
یوز قویدی گئدوب جانب میدانه پوزولدی
داماد بزندی حرم و سفره و لاله
وئردی او بساط اوسته فلک قانلی حواله
میثاقیده شمشیریله وصل اولدی وصاله
آفت یتیشوب صحن گلستانه پوزولدی
عباس یخلدی اودی بنیاد یخلدی
اللّر کسیلوب قامت شمشاد یخلدی
قد اِنکَسَر ظَهَرَ اسناد یخلدی
فکر ائت نجه اول قامت مردانه پوزولدی
آتدان یره اندیردی وزیری رخ ساده
بیر پیل صفت گلدی عمود الده عناده
شطرنجده شه مات ائلدی شاهی پیاده
کیش ایلدی سس دوشدی بیابانه پوزولدی
قولسوز باش آچوق محضر دلداره یتشدی
مین یاره ئیلن یاری گوروب یاره یتشدی
گُل آچدی وجودی ئوزی گلزاره یتشدی
جان اوسته گوروب جانینی جانانه پوزولدی
قوچلار یاتیشوب یان یانا قالدی قوزی قربان
مُغ، مُغبچه الده او زمان اولدی نمایان
تاپدی یرینی بوس ائده اوچ شعبه لی پیکان
پیکان ئوزی ده پیکینه رندانه پوزولدی
مهدور دم اولدی نیه سلطان مدائن
الله قاننی توکدی یره امّت خائن
قان بحرینه مستغرق اولوب جمله سفائن
دین کشتی سی غرق اولدی او طوفانه پوزولدی
دنیا نجه تار اولدی هوا تیره بوروندی
محبوب خدا قوملارین اوستونده سوروندی
مصداق اِذا زُلزلتِ الارض گوروندی
توز قالخدی توز اوستن گنه میدانه پوزولدی
اود وردیلا قرآن داغیلوب آیه سی یاندی
الله ائوینون خیمه و همسایه سی یاندی
دوشدی خطره دین نبی پایه سی یاندی
یغمایه گئدوب خانه و کاشانه پوزولدی
هر یرده اناالحق دئدی داش وئردی جوابین
حق آلدی اناالحق سسینون موج خطابین
درک ایلدی گه زینبینی گاه ربابین
آخدی گوزونون یاشی زنخدانه پوزولدی
سیر ایلدی (بیضا) اوتوز ایل سلک طریقی
تا ساحله توفیق تاپوب فُلک غریقی
سرشار ائلیوب سینه سینی عشق حقیقی
درویش گوروب کسوت شاهانه پوزولدی
کافر دگولم تابع قرانم ازلدن
تکفیر ائلمه شرم ائله زاهد بو عملدن
سجّاده ده لبّاده ده جاندا گئدر الدن
اوندا گورونر مسجد و میخانه پوزولدی
- جمعه
- 12
- شهریور
- 1400
- ساعت
- 23:8
- نوشته شده توسط
- یوسف اکبری
ارسال دیدگاه