بو دیار کربلادور کعبه ایمان باجی
من گرک بوردا کسم یتمیش ایکی قربان باجی
کربلادور بوردا باجی جلوه‌ی دلدار وار
جستجو وار جذبه وار شوق جمال یار وار
بزم خلوت انس و الفت لذّت دیدار وار
هم بهشت آرزو هم رحمت رحمان باجی
من بو صحراده مکرّر عکس منظر چکمیشم
عکس منظر نامنه تصویر دلبر چکمیشم
آرزوی وصلنی حسرتله ایللر چکمیشم
تاپمیشام جانانیمی آیریلمارام بیر آن باجی
هر بلا بو یرده گلسه باشیمه تاب ایلرم
عاشقانه ترک اهل و قوم و اصحاب ایلرم
بسکه بو دشتی قیزیل قانیله سیراب ایلرم
کربلانی ایلرم پروردهی احسان باجی
سرگذشت کربلا سرّ سرشتیمدور منیم
قانله باشدان یازیلمیش سرونشتیمدور منیم
ایستی قوملار اوستی دیبای بهشتیمدور منیم
فرش عرش عشقدور یا سُندس رضوان باجی
باش باشا قویماق بو یرده تیغ زهرآلودیله
عهد و پیمانیمدی باشدان حضرت معبودیله
سوز ویروب سوز آلمیشام من شاهد مقصودیله
سینسا جان پیمانه‌سی سیندیرمارام پیمان باجی
بو گلستاندا کی هر بیر برگی یارین لطفیدور
بیر قزل گُل وار کی اون سگّیز بهارین لطفیدور
بو گُلین هر جلوه سی پرودگارین لطفیدور
تیز اولار بو گُل ولی گُل آچمادان خندان باجی
منده طاقت یوخ دیَم بو غنچه تر آدینی
باخ یانقلی قلبیمه قوی داغ اکبر آدینی
اُمّ لیلادن سوروش شبه پیمبر آدینی
گُل آدین سالماز دلیندن بلبل نالان باجی
هاردا اولسان یاده سال سرداریمین احوالینی
اوخلانوب پَرپَر چالان شهبازیوین شهبالینی
قرمزی قانیله دولموش مشگ مالامالینی
با وفا جاندان گچن سرداره جان قربان باجی
باش یاریلموش قول دوشوب باشدان ایاقه غرق خون
قدّ موزونی اولوب نخل عَلم تک سرنگون
پاره مشگی سینه سینده یاره حدّیندن فزون
تشنه لر سقّاسی امّا جان ویرن عطشان باجی
سوداَمر اوغلوم عطشدن سو یرینه قان ایچر
قان ایچر امّا انوندا قانینی پیکان ایچر
نوک پیکانی اَمَر چون شیره پستان ایچر
برگ ریحان تک اَسَر تترر اولور لرزان باجی
قارداشون چون خاطر آزادی فارغ بال ایدر
پیک پیکانی اورکدن حُسن استقبال ایدر
نازنین یارین چکر آغوشه حسب حال ایدر
خوش خبردور طایر دولت کیمی پیکان باجی
عاشق جانبازه جان لازم دَگول یوخ ایسترم
قان توکَن قامت بوکَن طاقت شکن اوخ ایسترم
اوخ عزیز خاطریمدور خاطرین چوخ ایسترم
خاطراتِ خوش گرامی تر اولور جاندان باجی
تیر گلور تقدیم دعوتنامه یار ایلسون
جام وصلی قانیله لبریز و سرشار ایلسون
قلبیمه یاتسون یانان دنیانی بیدار ایلسون
یار بی آزار اولور قلبه یاتان مهمان باجی
ظهر عاشورا کی قرص لاله گون آفتاب
آتشین رخساریدن یکسر کنار ایلر نقاب
جانیمی هم آفتاب هم قحط آب ایلر کباب
اوندا گَل گورقوملار اوسته یاتموشام عریان باجی
آخرین دمده بوجان سرتابپا مجذوب اولور
شوق دیداریله محو طلعت مطلوب اولور
ورد و ذکریم دلده یا معبود و یا محبوب اولور
یا کریم الصّفح یا ذاالعفو ودالغفران باجی
قان ایچنده ال آیاق چالام مناجات ایلرم
جان و دلدن باش و جان ویّرم مباهات ایلرم
حق سوزین اُلسَمده مین نحویله اثبات ایلرم
نیزه باشینده کسوک باشیم اوخور قرآن باجی
خیمه گاهیم اود دوتوب تبدیل اولاندا کول لره
هولدن اولاد و اطفالیم قاچالّار چول لره
بیر به بیر یغ باشیوه لطف ایت سارالموش گُل لره
قالماسون باشسیز اوشاقلار چولده سرگردان باجی
قید تندن قورتولوب آزاد اولاندا جانِ پاک
کفن و دفنین باره سینده اولما چوخ اندوهناک
نیزه تابوتیم اولور بُرد یَمانی خون و خاک
شمع بالینیم شرار آه مظلومان باجی
سویله (هندی) ضعف و نیسان حرفین عنوان ایتمه سون
خدمتینده صادق اولسون ترک شکران ایتمه سون
دردی واردی نوحه یازسون فکر درمان ایتمه سون
درد بی درمانینه من ایلرم درمان باجی
- جمعه
- 12
- شهریور
- 1400
- ساعت
- 23:17
- نوشته شده توسط
- یوسف اکبری
- شاعر:
-
مرحوم هندی تبریزی
ارسال دیدگاه