آفتاب کشور جان دور رضا
آبروی ملک ایران دور رضا
آستاننده ملائک خاکبوس
حجّت حق شهرتی شمس الشّموس
کشور شیعه اگر پاینده دی
تا ابد لطف رضادن زنده دی
مدّعی دِیر و کِنشتی نیلورم
تا خراسان وار بِهشتی نیلورم
جلوۀ حقّ عالمه وئرمیش جَلا
خلقی دیوانه ائدوب عشق رضا
اولدوم ایوان طلا دل بسته سی
کلّ دنیایه دَیَر گلدسته سی
حاجتون وار دور شه دلجویه دئ
دردون اولسا ضامن آهویه دئ
من رضانون عشقینه دل بستیم
صحن و ایوان طلانین مستیم
عصمت کُبرای حَقّه آند اولا
دست خالی هیچ کیمی سالماز یولا
بیر کسه حاجت یولون سدّ ایلمز
درگه یندن سائلی ردّ ایلمز
بارگاه اقدسه افتاده گل
آستانیندن اوپوب فریاده گل
گر اورکده موجه گلسه درد و غم
حضرتی اوغلی جواده وئر قسم
شه دی بو باب الحوائج اوغلودی
وار مریضون گل معالج اوغلودی
رشگ فردوس برین دور حائری
وار شب جمعه خصوصی زائری
کربلا شاهی خراسانه گلر
اوغلونا مهمان او جانانه گلر
شوری لن دلده نوا ایلر حسین
ارض طوسی کربلا ایلر حسین
- یکشنبه
- 14
- شهریور
- 1400
- ساعت
- 12:55
- نوشته شده توسط
- یوسف اکبری
- شاعر:
-
حاج داود صادقی تبریزی
ارسال دیدگاه