بیر بلبلم خزان يتشوب گلستانیمه
بیر طایرم فلک وروب اود آشیانیمه
بیر عاشقم که آتشِ عشقیله یانمیشام
معشوق فرقتی سالوب اود استخوانیمه
بیر بیدلم که آچمامشام دل شکایته
دل ویرمیشم رضایتله دلستانیمه
نامه عجب مقاله دی اوز شرحِ حاليمه
خامه انیس ِناله دی باخ همزبانیمه
من آشنای قاعدهٔ نظم اولمادیم
تا دگدی تیرِ طعنهٔ بیگانه جانیمه
اربابِ فضل عبث دگل عاشقدی نظمیمه
رونق ویروب حسین آدی شرح و بیانیمه
آه اول زمان که سسلدی ئوز اهلبیتنی
سویلوب گلون قوناق گیدیرم میزبانیمه
شهزاده لر قرارینی آلدی صدای شاه
یان سنده مستمع قولاق آس داستانیمه
بیر قیز دیردی ایتمه بابا عزمِ کارزار
باخ غصه دن سولان بو رُخ ارغوانیمه
بیر قیز دیردی تاپشوروسان بس کیمه منی؟
گلمزدی عمردن بیله بیر گون گمانیمه
بیر قیز دیردی گَل بیزی قیتر مدینه
يتسون الیم دوباره مکان و مُغانیمه
پوزقوندی حال ، فکریمه جولان ویرنمورم
روحُ القُدس گرک سوزی قویسون لسانیمه
شه سویلدی سکینیه ای نازنین قیزیم
سالما بو سوزِ آهویله اود نهانیمه
چوخ بوینومی قوجاقلاما حسرتله آغلاما
قاتما سرشکِ آلوی اشکِ روانیمه
ای خیرةَ النّساء زمانه نقدر وار
روحیم بدنده سالما شراره روانیمه
مندن صورا نوایه بو عالمده والی سن
خاصّه گلنده شامه گیدن وقته یانیمه
شه شاهزاده دن نجه آیریلدی بولمورم
گِتدی او طرز رشته بو گلدی زبانیمه
چیخدی امام خيمدن یوز قویدی مقتله
بیر قیز یولونی کسدی بنا شرح مقتله
عرض ایلدی اماندی بابا گتمه بیر دایان
بو حالیمی بهشتده یاده سالاندا یان
اَن ذوالجناحدن داخی آراممی آز آل
اگلشن یرده منی دیزون اوسته دوباره آل
اولما رضا غمونده گوزوم اشکیله دولا
نازیله بیر او قولّارون آچ بوینوما دولا
مطلق علاقمند اولی بلبل گولن گُله
بیرده گولر گولوم منی دیندیر گُله گُله
بو سرعتیله اولما قتاله روانه سن
سالما شراره بو دل و جان و روانه سن
گورمورسن اشقیا نجه ایلولّه قیل و قال
گیتسن شهید ایدر سنی گتمه یانیمدا قال
نه قارداشیم قالوب نه عموم وار نه بیر کسیم
بو حالده علاقمی تندن نجه کسیم
هیچ قیز بلایه دوشمسون عالمده من کیمی
سنسیز بولوم پناه اوزومه بیرده من، کیمی؟
بو آیریلیق زِ بسکه شراره سالور دله
وجهی او دور که جرأتیله گلمشم دله
آیا روادی سن کیمی بیر مهربان آتا
گوزدن جهاندا من تک عزیزه قيزین آتا
بول مم نقدر عشق محبّتنده وار اثر
قلبیم فراق آدین ایشیدوب بید تک اسر
خارِ فراق برگِ گلِ وصلی گر یارا
عالَم طبيب اولسا ساغالماز او بیر یارا
بو غنچه لیقدا اولما رضا گُل کیمی سولوم
اولسون کبود سیلی زجریله صاق صولوم
آیا نجه بو دامنِ وصلوندن اَل اوزوم
بیرده منیم زمانده سنسیز گولر اوزوم؟
بو وضعیله که ناقهٔ صبریم دوشوب گِله
ایتموم نه نوعی گردش ایام دن گِله
میدانِ دشمنه سنی عازم گورنده تک
نسگل گلور گوزوم دولور اشکیله جام تک
بو نسگل اوسته آغلارام عمروم نقدر وار
صحرالری دولانّام همیشه جنون وار
شاهی سالولّا عزّت و اجلالیله یولا
سالدی سنی بیبیم یولا زلفين یولا يولا
قوی منده کوی عشقه ادب پرچمین ساچیم
فرش ایلیوم یول اوسته اولا فرشِ ره ساچیم
سنسیز اسیر ایدر بیزی بولّم سپاهِ شام
شامون یولون پیاده چکر شامه صبح شام
من سنله بازدید ایدرم قتلگاه آرا
سنده خرابه ده گلوب آختار منی بابا
رسمِ وفانی عالَمِ الفت ده گوزلرم
گیت تئز قییت، یولون بو يول اوستنده گوزلرم
هر کیم باخا دیر بو بياناته (شأنیا)
روح القدس بو نوعی دوزوب نظمه (شأنیا)
سنده حسینه عرض ایله دردون نقدر اولا
صاحب سخا و كان کرم دور دیمز او، لا
- یکشنبه
- 14
- شهریور
- 1400
- ساعت
- 13:57
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه