بساط جشن مرتب ایدوبله آل مناف
قورولدی زوجه شیر خدایه بزم زفاف
زفاف فاطمه ده وارنچه دقیق نکات
اگر دیویلمه سه اولماز جلالتی اثبات
او وقت اولوب که بتولی عروس آپار سونلار
یول اوسته دوردی دایاندی شَفیعه عَرَصات
دیدی رضا دگولم من بو مِهره یا اَبَتا
ولی عم اوغلوما وار دور رضایتم ده ثبات
او دمده نازل اولوب جبرئیل گتدی پیام
دیدی رَسوله که زهرایه ایله تبلیغات
بهشت اثاثنی برده بو عالمین خُمسین
یازوبلا فاطمیه مِهر گویده کی قُضات
بتول اولمادی راضی عُروج ایدوب جِبریل
گلوب دوباره ایدوب عقل کله کشف نکات
بهشت نهرلریندن خدا دیور دورت نهر
بتول مِهرینه آرتوردوق ای اَمیر هدات
بو عالمین سولاری نداندا یازمشوخ دورد ین
بریسی بَلخ بری نَهروان و نیل و فُرات
حسین آناسینا مِهریه دور فرات اما
حسینی الدوره جاق تشنه کربلاده عَدات
باخار فراته دیرالعطش یانار جگری
یارالاری ندان آخار قانی هر یانا چو قَنات
دیدی بتول بو مِهره گینه رضا دگلم
پوزولدی حالتی دلگیر اولدی مَظهر ذات
امین وُحیّ گتوردی پیام رَب جلیل
بو نوع ایلدی خیرالورایه کشفیات
یری گوئی فلکی دوزخی له جناتی
حقّ ایتدی فاطمیه مِهر ای حَقه مُرات
گینه بتول دایاندی دیدی رضا دگلم
پیمبر آلدی قیزیندان او دمده توضیحات
قیزیم نه ایستوسن علت نه دور رضا دگوسن
گلوب تکلمه عرض ایتدی اول حَمیده صِفات
نظر بابا بلوسن اُمتین شفاعتی دور
منه نه لازمه دور حُوض کُوثر و جَنات
امین وَحیّ نِزُول ایتدی الده بر طُغری
او مِهرنامه نی زهرایه ایتدی تَقدیمات
یازوب او نامه ده دادار دست قدرتیله
حبیبه دور منه زهرا شَفیعه عَرصات
قیامتین گونی زهرا اگر شفاعت ایده
بغش لرم اولی مُستوجِب بهشت عَرصات
او مِهر نامه نی بر حقه ده بتول آلدی
محافظ اولدی او طُغرایه تا واریدی حَیات
دیدی النده عم اوغلی بو حقه نی ساخلا
منیله دفن ایله من نوش ایدنده جام مَمات
دیدی ندور دیدی بو حقه مِهر نامم دور
بو دور جزاده ویرن جَدّیم اُمتینه نجات
مَطُول اولدی سوزون مختصر بیانی لیه
چتین (حسینی) تاپا خاتمه بو تالیفات
- یکشنبه
- 14
- شهریور
- 1400
- ساعت
- 14:32
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه