حیف اولا که اودلی سینه اولمادی وَقایه قارداش
گوستروب قضا سو مشگین ناوک جَفایه قارداش
مشگ آبله فراتی قصد ایدنده من برادر
تا خلاص اولا عطشدن، خیمه لرده آل حیدر
عزت فراتی گورجک، آرزو ایدوبدی کوثر
خلددن اولیدی جاری دشت کربلایه قارداش
بانگ العطش اوجالدی تا سپهر نیل فامه
اشگ دیده مثل باران، توکدی چرخ چون غمامه
سوزِ آهِ تشنه لب لر، مانع اولدی اخذ کامه
اولدی ابر تک بو باران، منتشر فضایه قارداش
اولدی تیر جان شکاره، مشک آبه تا نشانه
بو کش کش ایچره گلدی، گوز پیاله سی گمانه
مین امیدیله ال آتدیم، جام چشم خون فشانه
بو قدح ده سیندی اما گلدی دل نوایه قارداش
واردی جورِ اشقیادن گر چه دلده مین حکایت
قفل همتی له اما بسته دور لب شکایت
واپسین مراحلم دور، ایله سن اگر عنایت
آرزو ایدر دئسون دل، دردین آشنایه قارداش
اشتیاقی دن وجودیم سر به سر دوتوبدی آتش
شوقِ وصلون ایلیوب دور حالت دلی مشوش
هر نفس نفسله ایلر حسرتونده جان کشاکش
بیرده بلکه نائل اولسون، نعمتِ لقایه قارداش
کسمیوب نقدری اُلفت، جسم ده نفس نفسدن
چوخ چتین کسه امیدین، دادخواه دادرسدن
سسلرم سنی هرایه ال اوزولمه میش بو سسدن
قویما نا امید اولوم من، ویر صدا صدایه قارداش
شرحِ شوقه عاجزم من، یتمسه مدد سوزومدن
ایسترم ولی شهادت شورِ عشقمه اوزوندن
جانب بهشته گوردون، دونمدی اوزوم اوزوندن
وای منه که ایندی گلمیش هجر آدی آرایه قارداش
ضربِ تیغ و خنجریله باش یارالی، تن یارالی
داغ مرگ اکبریله سنده قلب دن یارالی
اوزگه حال دور برادر، سن یارالی من یارالی
کیمدی ایلسون مداوا بیر بئله یارایه قارداش؟
همتیم اراده ایتدی فتحی، جنگده ازلدن
یتمه میش حصوله مطلب ال گوتورمسین جدلدن
بین رَه دَه اَل کسیلدی تا الیم اوزولدی اَلدن
بو شکست ویردی جُرات لشگر جفایه قارداش
هر طرفدن اولدی عازم، قتلی مه سپاه دشمن
جسم دن دئمم که یکسر پاره لندی درع و جوشن
همتیم مقابلی نده باش اگوب عمود آهن
قویمادی عدو اوجاتسون باشیمی جدایه قارداش
- پنج شنبه
- ۱۸
- شهریور
- ۱۴۰۰
- ساعت
- ۱۸:۲۳
- نوشته شده توسط
- یوسف اکبری
- شاعر:
-
محمد عابد
ارسال دیدگاه