خدا آدیله او فِعلی که اِبتدا اوُلماز
قُصورِ کَامل اوُلار فِعله اِنتها اوُلماز
خدا آدیله او دور باشلادیم او مَطلبی من
خدادن اوُزگه سینه اِتِکا سزا اوُلماز
بِلال شُوری بَلالی باشیمدا اَلده قَلم
اگر چه لایِق شاُنی سوزوم اَدا اوُلماز
اِیدوبدی شُورِ پیمبر بِلالی شُوریده
اِیله مُهیج و پُر شُور ماجرا اوُلماز
موُذنِ نَبوی پیرو حَقیقَتیدی
مَجاز اَهلی اوُلان قَلبی دَه صَفا اوُلماز
همین که اِیلدی رِحلت پیمبر رَحمت
گُوروب رَعایتِ مِصداق اِنَما اوُلماز
اَذانی تَرک اِیلدی وِیرمدی اَذان بِلال
دِیدی که خادِم شَه خادِم گدا اوُلماز
نَقدر اِیتدیله خواهش بِلال اَذان وِیرسون
جَواب وِیردی بو مَنظُور مُطلقا اوُلماز
اَبی قَحافه نون اوُغلی خِلافته یِتسون
مُوافقِ نَظرِ خَتم اَنبیا اوُلماز
علی وَصیِّ بِلا فَصل حقِی غَصب اوُلسون
بو اَمره آند اُولا اَللهه حقّ رِضا اوُلماز
سفارش اِیلَدی بیر گُون اوُزی خانم زَهرا
بِلال اَذان دِیمه سن دَردی مه دَوا اوُلماز
بابام پیمبری چوخ گُوگُلوم اِیستوری هر چند
سنه اِمامِ جَماعَت او مُقّتدا اوُلماز
سسین گَلنده دوشَر یادیمه رَسولِ اَمین
منه تَسلی دِل اوُزگه بیر صَدا اوُلماز
بِلال گُوردی بَتولین سُوزین یِره سالسا
مُوافقِ دلِ سُلطانِ اوُلیا اوُلماز
گَلوبدی مَسجد پیغمبره اَذان دِیماقا
زَمان اَگر چه دونوب بیرده ما مَضی اوُلماز
بِلال حُزنِ تَمامی لَه سُویلدی تَکبیر
گُورن دِیدی اِیله مَحزون اِیدن صَدا اوُلماز
اِیشتدی فاطمه تَکبیری اِیلدی تِکرار
دِیدی که اوُزگه سی مُستوجبِ ثَنا اوُلماز
دینده اَشُهد اَن لِاالاه اِلا الله
خانم بویوردی خدادَن سُوا خدا اوُلماز
اوُچومجی فَصلین اَذانین دِین زَماندا بِلال
قیامت اوُلدی دِیسم گر سُوزوم خَطا اوُلماز
پیمبر آدی سالوب دور مَدینیه بیر شُور
که حَشریده اِیله بیر شُورِ غَم فَزا اوُلماز
قاریشدی بیر بیرینه آغلادی اُناث و ذُکور
جَهان نَقّدر اوُلا اِیله بیر بُکا اوُلماز
مَدینه دَن فَلکه وا مُحمدا اوُجالوب
اِیله یاران جگری وا مُحمدا اوُلماز
آتاسینین اِیشدنده گُوزَل آدین زَهرا
دِیدی خَراب نَدَن عَرضیله سَما اوُلماز
بابا بابا دِیدی از بَس یخلدی غَش اِیلدی
بِیله وَفالی قیز اِیله رَوُف آتا اوُلماز
خبر وِیروبله بِلاله دایان بَتول اُلدی
کَسوب سسین دِیدی بیرده بو سس رَسا اوُلماز
خیال اِیدوب آلا ثانی بِلالیدَن بِیعت
او حاضر اوُلماسا بیر عِده هاکَذا اوُلماز
- یکشنبه
- 28
- شهریور
- 1400
- ساعت
- 17:50
- نوشته شده توسط
- یوسف اکبری
- شاعر:
-
مرحوم حافظی تبریزی
ارسال دیدگاه