سن بوگون لیلانی غمدن ایلدون آزاد اوغول
سر بلند ایتدون منی اولسون ایوین آباد اوغول
شش درِ حیرتده قالموشدوم علی من نا امید
ای امیدیم فیضِ عظمادَن منی ایتدون سعید
ایلدون لیلانی سن زَهرا یانندا رو سفید
ایلسون اوز نیتوندن حقّ سنی دل شاد اوغول
جانیمی ویردوم جفایه من على اون سگز اِیل
قلبمی شاد ایلدیم چکدوقجه زحمت هر قبیل
چکدیقیم زحمتلره ویردون بو گون اَجرِ جزیل
مرشدِ کامل سنی ایتمش عجب ارشاد اوغول
گلشنِ حسنونده اولدوم باغبان گل بسلدیم
گویلمی عشقون گلستانینده بلبل بسلدیم
ای گلوم بلبل کیمی وئردوم سنه دل بسلدیم
گویلمی زلفون کیمی گَل ایلمه بر باد اوغول
من سنه هاجر کیمی زیب و صفا وئردوم علی
بومنای عشقده قلباً فدا وئردوم علی
چونکه راضی دور آتان منده رضا وئردوم علی
ایمدی سندن اَل گوتوردوم هر چه باداباد اوغول
زینت حسنونده ایتدوم هر قدر من اهتمام
اولمادی ای نوجوانیم زینتون حُب المرام
من سُوؤَن زینت على اوندا اولور سنده تمام
آق یوزونده قاره و قرمز اولا اضداد اوغول
ایلیوب طغیان بو گُون ظلمنده بو اهلِ ستم
حقّی ناحقّ وجهله باطل ایدوبلر متّهم
ایلمه اهلِ ستمدن رَم سن ای صیدِ حرم
گیت سنی صید ایلسون بو چولده مین صیاد اوغول
وقت آز قالدی گچه گئمتمک دَه تأخیر ایلمه
حالوی بعضی خیالاتیله تغییر ایلمه
دورما گیت ای یوسفیم یعقوبی دلگیر ایلمه
قتلوه آماده دور هر چند مین صیاد اوغول
بیر طرفدن کربلا شاهی دِیر هَل مِن مُعین
بیر طرفدن هل هله ایلر گروهِ مشرکین
بیر طرفدن واحسینا سسلوری روح الاَمین
بیر طرفدن باش آچوب پیغمبر ایلر داد اوغول
گلشنِ زَهرایه از بسکه یتوب سوزِ عطش
بیر به بیر گللّر سولوب اوز شاخه سینده غنچه وَش
اَل ایاق چالماقدان اصغر دوشدی دلدن، ائتدی غش
خیمگه دَه شهربانو دور ائدر فریاد اوغول
مصحفِ رخساروی ایتدیم تلاوت خط بخط
هر نه گوردوم گورمدیم زیر و زبرده بیر غلط
تک به تک هر صورتون أوسته یازیلمش بیر فقط
باء بسم اللهی ایلر نقطه خالون یاد اوغول
(طوریه) طورِ محبّتده اولوبسان جلوه گر
نُورِ عشقوندن اونی نُور ایلیوب سن مختصر
متّصل گوزدن توکر اشکِ بصر شام و سحر
هر ایکی دنیاده ایله سن اونا اِمداد اوغول
- سه شنبه
- 30
- شهریور
- 1400
- ساعت
- 19:23
- نوشته شده توسط
- یوسف اکبری
- شاعر:
-
مرحوم استاد طوری تبریزی
ارسال دیدگاه