الیمده خامهء محنت اثر، گوزوم پُر آب
اسیر ایدوب منی، وار یازماقا قلمده شتاب
ندور غرض هله تصمیم یوخدی منده، ولی
اورکده لرزشِ محسوس واردی چون سیماب
علی آدیله گرک باشلیام بو مطلبی من
دَگل نه چونکه علی خاطراتی جز اعجاب
یازولّا غزوهء صفّین دَه علی بیر گون
تمام لشگرینی جمع ایدوب ایدوبدی خطاب
بو نیّتیله گیده غم غباری یوزلردن
بویوردی جملهء افرادی ایلسونله خضاب
قیافه لر اولا شاداب، چهره لر خندان
اطاعت ایلدی امرِ امامیدن اصحاب
فریضه بولدوله مولانین امرینی افراد
اولا مقابلِ دشمنده چهره لر شاداب
هامی خضاب ایلدی اوز محاسنین، اولسون
اطاعت امرِ شهِ دینه یا اولوالاَلباب
باخوب گوروبله امام ایتمیوب خضاب امّا
همان او حالیله وار شهریارِ عرش قباب
همان قیافهء سابقدی چهرهء محزون
دوشوبله حیرته بو ماجراده شیخیله شاب
تعجّب ایتدیله عکسِ قضیّه دَن اصحاب
سوروشدولار ندی عنوانِ ترکِ استحباب
نیه سوروشدولا من بولمورم، بولوردی اولار
امامه ظاهریدی عالَمِ ظهور و غیاب
تمام ایشلری حجّتدی حجّةُ اللّهون
بولوردولر ندی مطلب زِ راهِ استصحاب
سؤال ایدنلره تا مطلبی ایده روشن
کمالِ حزنیله اول شهریار ویردی جواب
بویوردی سیز منیله ایتمیون قیاس اوزوزی
مقامِ عیش منه قویمیوب جهانِ خراب
ئولنده فاطمه مندن گیدوبدی ذُوق و صفا
شرارِ هجری یانان قلبیمی ایدوبدی کباب
قالوبدی غصّه و غم اِرث مرگِ زَهرادن
او گیتدی، مندن ایدوب قطعِ رابطه اَحباب
نه بیر گلوب گیدن اولدی نه حالیمی سوروشان
اولوبدی لیلهء یلدا منه شبِ مهتاب
تاپاندا گوشهء خلوت اوزوم تک و تنها
آخار عذاره گوزوم یاشی دیده دَن چو سحاب
منه نه فایده عیش و صفای عالمدن
بتولین آیریلیقی ایلیوب بیله ایجاب
نه گلشن و گُله نه گلستانه وار نظریم
صفالی گللّریمون گوز یاشی آخار چو گلاب
باخاندا زینب و کلثومه آغلارام یانّام
ملال و غصّه مه عالمده یوخدی حَدّ و حساب
حسینیله حسنین گل یوزی سولوب سارالیب
غبارِ غم اولاریندا چکوب یوزونده نقاب
منیمده ظاهراً عمریم گونی غروب ایلدی
او گونکه بستری زَهرانین اولدی تیره تُراب
او عصمتین گونونون پرتوِ جمالیندن
ایشقلاناردی نمازه دوران زمان مِحراب
آلاندا دشمن اَلیندن منی، اولوب مَجروح
اولار شهادتِ زَهرایه اولدی فتح الباب
ایله سولوب سارالیب آفتِ خزانیله
یوزینده قالمیب آثارِ عنفوانِ شباب
لطیف قلبینی قان ایلمیشدی غصّه و غم
یاناردی، عارضه گوزدن توکردی گُوهرِ ناب
ایله یورولدی ایله تنگه گلدی دنیاده
گونوز نه راحت اولاردی ایدردی نه گجه خواب
فریضه دَن صورا هر گون دییردی حسرتیله
وفاتیمی یاخین اِیت یا مُسبّبُ الاَسباب
بتولین اولدی دعاسی اِجابته مَقرون
او وقت اولوب که اولا قطع گوزده کی سیلاب
ولایت اوسته مریض اولدی گیتدی دنیادن
منه او بابِ مصیبتدن آچدی مین ابواب
طنین اولاندا خَلّوا خطابی مسجددَه
او باعث اولدی قولوم دان آچیلدی بند و طناب
منی قلجلارین آلتیندان ایلدی آزاد
کمالِ همّتیله یادگارِ ختمِ مآب
منیمده اولدی او گوندن گونوم قرا گجه تک
او ماهِ عصمته چکدی تُرابِ تیره حجاب
گر اولمییدی که دین اقتضا ایدر، حاشا
قبولِ امر ایلیدیم، دِگل بیر امرِ صواب
نه بو خلافته من راضیم نه دنیایه
جهان و اهلِ جهان روحی مه ویرولّه عذاب
علی حکومتی امنیّت و عدالتِ اولار
نه جور و ظلم و خشونت نه وحشت و ارعاب
عراق سهلیدی دنیانین حکومتین ویره لر
قبول ایلمَرَم، اولمارام بو امره مُجاب
اولار معاویه نین شأنی نه برازنده
اونون گوزونده مساوی اولار گناه و ثواب
او آنلاماز که حقیقت ندور، مجاز ندور
اونا تفاوتی یوخ اولسا آب یا که سراب
حکومتیمده منیم اولسا بیر نفر مظلوم
جزا گونونده یوخوم دور او ظلمه طاقت و تاب
اگر اولا بیرینون حقّی پایمال، منیم
حکومتیمده، قالار روزِ محشره بو عقاب
محالی دور اولا بیر مور مندَن آزرده
ولو یازا منه دنیا حکومتین کُتّاب
گرک او گونده اولام من جوابگو ناچار
او گون جزا گونودی اوندا قطع اولار اَنساب
قیامتین عطشین گورمسن یقین #خوندل
علی گر ایتسه سنی جامِ عشقیدن سیراب
سنونده نور اولاجاخ پیشِ پایوه عملون
طلوع ایدنده رخِ آفتابِ عالمتاب
عمللّرون اگر اخلاصیله اولا، قهراً
گذشت ایدر گنهون اولسا خالقِ وهّاب
نه شاعرم که ایدم تکیه یازدیقیم شعره
نه #صافیم نه #حسینی نه ده #یتیم نه #شهاب
اگر بو درگهه بیر ریزه خوار اولار، او منم
منیم الیمده نه دیوانِ شعر وار نه کتاب
- سه شنبه
- 30
- شهریور
- 1400
- ساعت
- 20:27
- نوشته شده توسط
- یوسف اکبری
- شاعر:
-
حاج حیدر خوندل
ارسال دیدگاه