یوموبدی گوزلرینی شاه لافتا بو گیجه
فنا جهانیدن آیریلدی مرتضی بو گیجه
صدای ناله گلور فرشه عرش داوردن
باتوبدی ماتمه گویا که ماسوا بو گیجه
نه چون کسوفه دوشوب شمس عالم امکان
نجومدن اولورری انقطاع ضیا بو گیجه
غبار غم بوریوب عالمی مصیبتدن
تحوله یتشوب عرش کبریا بو گیجه
آچوبدی کثرت غمدن باشین رسول گرام
اولوبدی مرثیه خوان ختم الانبیا بو گیجه
گلوبدی فاطمه آه و نوایه جنّتده
دیور عم اوغلی سنه فاطمه فدا بو گیجه
ویرور تسلی اونا یکسره جنان اهلی
یارالی قلبینه دگدی گینه یارا بو گیجه
عجب مصیبت عظمادی یوز ویروب خلقه
بیر آیری حاله قالوب شاه کربلا بو گیجه
حسن حسینه تسلی ویرور حسین حسنه
باخولا بیر بیره ایلولَّه آه و وا بو گیجه
یانخلی دیللریله اوخشاما دیور زینب
بلالی باشی تاپوبدور گینه بلا بو گیجه
دونوبدی گوزیاشی قانه گوزونده عباسین
اولوبدی ورد دلی دلده وا اَبا بو گیجه
دیار کوفه ده غوغادی شدت غمدن
یتیم لر ایلیور نی کیمی نوا بو گیجه
بیری دیور گیجه لر باش چَکن یتیمیلره
یقین علی اوزودی گلمدی خدا بو گیجه
بیری ایاق سسینه باغلیور آچور قاپونی
دیزینده قالمور آجندان داخی قوا بو گیجه
نه ایسته سن ای (عتیق) ایسته بذل اِیده مولا
نه ایسته سن کرمیندن ایدر عطا بو گیجه
- چهارشنبه
- 31
- شهریور
- 1400
- ساعت
- 12:59
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه