دور یاتما اِیتگین قَبرده باغرم دونوب قانه آنا
ئولدی آتام گَل کوفیه شامِ غریبانه آنا
شُوره گلن بلبل نجه گلشن سرانی آختارار
ماتم زده اِنسان نجه شُور و نَوانی آختارار
غم یوز وِئرنده رسمی دور هر قیز آنانی آختارار
گَل گُور نه نُوعی زینبون غمدَن گلوب جانه آنا
ای ماهِ یثرب کوفه ده شاهِ ولایت یاسی دور
اُمّت اِمامین ئولدوروب تئز گل اِمامت یاسی دور
ظالم لره اُولسون خبر حق و عَدالت یاسی دور
مظلوم لر گلسون گرک بو غمدَه اَفغانه آنا
نُورِ هُدانی کوفه دَه قومِ ضَلال ئولدوردولر
جَهل اَهلی شورا قوردولار فَضل و کمال ئولدوردولر
مَفهومِ اِنسانیتی شبه الرجال ئولدوردولر
دنیا بویی نَسگل اُولا آزاده اِنسانه آنا
کاشانه میز باشدان باشا باخدوق جا غم آثاری دی
گر چه آتام هر مُحنته بیر نُقطهء پرگاری دی
اَمّا بیزه سندن صُورا بیر مهربان غم خواری دی
غم خواری میز اَلدَن گِئدوب پوزقوندی کاشانه آنا
گر چه مُصیبت دَن آخار رُخساره اشگِ حسرتیم
شرحِ ملالیم دَن سنه زَحمت دگولدی نیّتیم
گل گُور آنا سیزلار نجه اولدی آتا داندا یتیم
آخماز نجه گُوزیاشلاری حسرتله دامانه آنا
گر چه خلاص اُولدی آتام رَنج و مُصیبت دَن بو گُون
قورتولدی شاهِ اُولیا آزار اُمّت دَن بو گُون
امّا گرک ماتم دوتا عالم بو مُحنت دَن بو گُون
گلمز بابام مثلی داهی بو کُون و اِمکانه آنا
یرمی بش اِیل دوزدی آتام جور و جفای اُمّته
بو مدتی حسرت قالوب بیر اهلِ دل هم صحبته
دردِ دِلین چاهه دِئدی باخ نسگله باخ حسرته
وورماز بو نسگللّر مگر اُود قلبِ سوزانه آنا
حیرتده دی فکر اِیلین چرخین روال و گردشین
باطل لره دوران وئروب حق اهلی نون اَگدی ایشین
اولدی علی تک اِیش بیلن ایللّر بویی خانه نشین
دنیا یوزون تنگ اِئتدیلر اُول شاهِ مردانه آنا
دنیای خلقت دَه نجه مُمتازیدی شَخصیتی
شخصیتِ مُمتازی تک، تک اُولدی مَظلومیتی
اولماز او مَظلومیّتین تقریر اُولا کیفیّتی
بیر خالقِ یکتا بولر بیردَه او فرزانه آنا
ایرمی بش اِیل سندَن صُورا شاهِ ولایت اوُتدی قان
قالدی اَلی باغلی دیلی باغلی امیرِ مُؤمنان
باطل لره دوران وِئرن دورِ فلک دَن الاَمان
مظلومِ دهر اُولدی بابام نفرین بو دورانه آنا
من زینبم گُویا اولوب آب و گلیم غمله عَجین
گاهی سنون داغون گهی داغِ اَمیرالمؤمنین
بیر گون اِیچینده مُجتبی دستِ جَفادَن زَهرِ کین
اوندا منیم وای حالی مه قالام یانا یانه آنا
فریاد او ساعتدن اُولار دشتِ بلا مَسکن منه
نه ماجَرا نه کشمکش وار اوردا واضح دور سنه
مَخیم یانار مَقهور اُولار آلِ پیمبر دشمنه
گل اوندا همدم اُولماقا جمعِ پَریشانه آنا
الله یولوندا هر بلا باشه گله یوخ دور سوزوم
چون اولموشام دلدن رضا هر بیر بَلیّاته اُوزوم
امّا اُوزون آگاه سن اِیستر نه اندازه دوزوم
یانمیش چادردا ناله و آهِ یتیمانه آنا
بانی سی (اصغر مونسی) اُولدی ازَل بو نوحه نین
بیزدن عنایت اُولدی تا بو طَرزله یازدی (حزین)
الله دان اِیسته اُونلارا قسمت اولا بیر اَربَعین
اُولسون لا زوار، حرمِ شاهِ شَهیدانه آنا
- چهارشنبه
- 31
- شهریور
- 1400
- ساعت
- 13:2
- نوشته شده توسط
- یوسف اکبری
- شاعر:
-
مرحوم حزین زنجانی
ارسال دیدگاه