یانماسیدی باب زهرا ظلمیله شورا گونی
خیمه گاهی زینبون یانمازدی عاشورا گونی
حکم قرآنه او گونگی گونده اولسیدی عمل
مطلقا اولمازدی بر پا جنگ صفین و جمل
هم دولانمازدی حسینون قانلی باشی ال به ال
ایلمزدی پرده رخ صورت زیبا گونی
ایتمه سیدی حقیله باطل او گون جنگ و جدل
بیر به بیر احکام قرآنه ایدردی خلق عمل
دین اسلامه یتیشمزدی بو نوعیله خلل
روشن اولمازدی جهاندا کافر و ترسا گونی
چوخلارین خارج ایدوب دنیای جیفه دیندن
نفسینه تابع اولوب چخدی خلیفه دیندن
چخماسیدی سرنشینان سقیفه دیندن
دین ایوین یخمازدی شمر بی حیا هیجاگونی
زوریله غصب اولماسیدی بو خلافت منصبی
قورخودان گزلتمسیدی خلق اصل مطلبی
دستگیر اشقیا اولمازدی اولاد نبی
گوزلرینده ایلمزدی لیله یلدا گونی
چخماسیدی هر ستمگر منبر پیغمبره
ویرماسیدی بند ذلت بانوان حیدره
کوفه دن گلمزدی بو فرمان امیر لشکره
باغلا اطفالی طناب ظلمیله ایذا گونی
ایتمسیدی گر خلیفه غصب املاک فدک
بیر کس ایتمزدی خلافت امرینه القاء تنک
کربلاده روز عاشورا حسین قالمازدی تک
تیره گون اولمازدی گوزده زینب کبرا گونی
اونداکی گوردی اولوب قارداشی خندان گل کیمی
سینه سینده باش باشا اوخلار چاتوب سنبل کیمی
باشلادی شور و نوا شوریده بیر بلبل کیمی
ایلدی بیله مخاطب بلبل شیدا کیمی
ای گون انجتمه حسینی بی کفن دور بی کفن
گورموسن رحم ایلین یوخدور اونا رحم ایله سن
قویما یانسین گون قباقنده یارالی بو بدن
سایبانی اول اوزون ای خالق یکتا گونی
ای گون آرتدوقجا ستملر آرتوری نورون سنون
وار بو سوز و بو حرارتدن نه منظورن سنون
فرض ایداخ مجروح اولیدی پیکر عورون سنون
تیره شب خلقه ایدردون بیله نور افزا گونی
تاپمادون بیر گون طلوعنده حسینی خوابده
دائما گوردون عبادت وقتی پیچ و تابده
بو گونی اما یاتوبدور قانلی بیر محرابیده
تا اولوب لیله مبدل عترت طاها گونی
ایتمدی اوز خدمتنده قارداشیم هرگز قصور
هر یارا بو زخمداره آرتورور وجد و شرور
قانلی توپراقدا یوزی عرض ایلور ای رب غفور
دست خالی ایلمه اوز بنده وی سودا گونی
(کهنموئی) گون کیمی قالماز حقیقت ابرده
عاقبت شیرین ثمر وار ناگوارا صبرده
اهل حق المز اگر یاتسا مین ایل ده قبرده
سربلند ایلر اونی حق محشر کبری گونی
- شنبه
- 3
- مهر
- 1400
- ساعت
- 14:36
- نوشته شده توسط
- یوسف اکبری
- شاعر:
-
مرحوم سیّد حسین کهنمویی
ارسال دیدگاه