بس آتام ابوالفضل هایاندادی هایانا ایدوبدی سفر آنا
نه پیامی گَلدی نه نامه سی نه اوزیندن اولدی خبر آنا
غم هجریدن سارالوب یوزیم گئجه گوندوزی غمه دولموشام
گَله کاش بیرده بابام منیم گوره گُل کیمی نجه سولموشام
بو سفر دگل یقین ایلورم بو جهاندا من یتیم اولموشام
منی سسلوری آتاسیز هامی منه بو غم ایلور اثر آنا
گوزیمون یاشین اَلیَم گرک سبب اولدی گوزیاشیما بابام
نولی بیر گَله وطنه گنه باخا یار و یولداشیما بابام
آلا گوگلیمی، منی دیندیره، اَلینی چکه باشیما بابام
یقین اولسا گَلماقی یثربه بو یانان دله سو سَپَر آنا
گورّم اوندا که گَلوری بابام منی ایلوری گنه سرفراز
بو تازا لباس لاریمی گِیوب ایدرم جلالیله پیشواز
غم و دردیمی دیرم اونا ایلینده سینه سی اوسته ناز
قولونی سالار گنه بوینوما بو سولان یوزیمدن اُپر آنا
گهی گُلشنی گوگل ایستوری، گهی گُل لری گوزوم آختارور
گهی یادیمه دوشوری آتام، گهی ائل لری گوزوم آختارور
گهی نازدانه رقیّه نی گهی اصغری گوزوم آختارور
هله صبر ایدوب یانوب آغلارام باشیما گوروم نه گُلر آنا
باخوسان منه نیه سن آنا گوزیوین یاشین یوزه باغلوسان
منه دی سنی بابامون جانی نه اولوبدی سینوی داغلوسان
دی گوروم ایوین یخیلوب مگر نه غم اوز ویروب بیله آغلوسان
آتام اُلمیوب نیه آغلوسان نه فغاندی ساقدی اگر آنا
نیه سولموشام ویروری نشان منه گونده آئینه ی گوزوم
بو یتیمه لیق توزی دور قونوب یوزیمه منیم، بُلورم اوزوم
منه طعن ایدور گوروم هر اوشاق بو شماتته نجه من دوزوم
نجه گیزلدیم بو ملالیمی آتاسیز اولان بُلونر آنا
یوخودا گیچن گئجه گورموشم بابامون یِرین من بینوا
ایله غم فزا یِریدی او یِر آدینا دیوردیله کربلا
سو یانندا دوشموشیدی بابام بدنی سراسریدی یارا
ولی قولّارین گوره بُلمدیم ایلدیم نه قدری نظر آنا
اوخیلان پر آچموشیدی اوزی، علمی بلشمیشیدی قانا
تَکیدی، یانندا نه آغلیان نه گَلوب گیدن واریدی آنا
ولی بیر بِلی بوکولَن خانم ایله داد ایدوردی یانا یانا
اوزی قاره پوشیدی بُلمدیم کیمیدی او نیکو سیَر آنا
کیم اولا دیدیم بو قدی کمان بابامی ایدوب بیله وقته یاد
دیدیلر بو فاطمه دور بالا، قاپوسی یانان محنی زیاد
گوروسن قابورقالاری سینوب ایدوری شکسته فغان و داد
تانودیم صورا آنامیزدی بو بیله اشک چشمین اَلَر آنا
دوشوب اوردا خیمه گهه یولوم، دیدیلر بو طفله پناه اولون
منی عمّم آلدی قوجاقینه سالوب اوردا بوینوما تا قولون
باشیما اَلین چکوب آغلادی دیدی گوزلمه باباوین یولون
یقین ایلدیم یخیلوب ایویم اورگیمده ویردی خبر آنا
دیدیم عمّه جان نیه آغلوسان نیه اولموسان بیله دلفکار
بس عموم حسینه عم اوغلوما نه گَلوب منه ایله آشکار
دیدی آل هاشمیدن بالا قالوری فقط بو علیل زار
پوزولوب دیدیم یانا یانه من غمه سینم اولدی سِپَر آنا
منی تا رقیّه گورن کیمی دولان ابر تک توکوب اشکینی
دیدی گیت مدینه ده قاره گِی داخی چکمه سن بابا رشکینی
گَتیروب سالوبدی بو چیگنیمه بابامون او اوخلی سو مشکینی
بیله بیر محن گوره بیر بالا ایله وقتیده نه چکر آنا
قِییدوب گَلوردوم او وقتیده دیدی گیتمه صبر ایله بیر دایان
منه گوستروب علی اصغری باخوب حالینه ایلدیم فغان
او گوزل بوغازینی تیغ تک اوخ ایله بیچوب سوزولوردی قان
مگر اوخلانار سودامر بالا بو غم هیچ خیاله گَلر آنا
بو نه سوزدی «اعظمی» یازموسان باخان اشکیله دولوری گوزی
بیله غم یقیندی یازیلمیوب بو بالا عنایت ایدوب اوزی
باخوب آغلا وِردِ زبان ایله گئجه گوندوزی بو همان سوزی
بس آتام ابوالفضل هایاندادی هایانا ایدوبدی سفر آنا
- شنبه
- 3
- مهر
- 1400
- ساعت
- 20:24
- نوشته شده توسط
- یوسف اکبری
ارسال دیدگاه