بو قطعه به قطعه قانلی پیکر، آئینه ی مصطفادی قارداش؟
یا باشدا قلج یاراسی حیدر، محرابیده مرتضادی قارداش؟
گیرم ایدوب اقتضا مشیت، کج دور ایلیه بو چرخ گردون
قانه بویانا بو ماه طلعت، لیلانی ایده فراقی مجنون
امّا ندن ایتمیوب مروت، بو لشکر کینه پرور و دون
بیر حاله سالوبلا بو جوانی، آد پیکر اوزی نمادی قارداش
سن عهد اَلَسته ایتدون ایفا، بیر لطفیدی بو سنه خدادن
تقدیر اولونان قضایه اصلا، ت غییر یِتیشمدی بدادن
کبرانی بُلوندورر بو صُغری، ظاهردی خبر بو مبتدادن
قانون توکَجاقلا بو جماعت، ظلمه هله ابتدادی قارداش
آلجاق سسینی بو مه لقانون، قارداش ساری گُل کیمی سارالدون
گیتدون گوره سن عزیز جانون، نولدی سببی بو حاله قالدون
امرونله گَتوردوله جوانون، آز فاصله ده ولی قوجالدون
ناکام اوغولی اُلن آتادن، آری بو عمل سزادی قارداش
گورجک باشینون قلج یاراسین، دوشدی آتامین یاراسی یاده
بو دشتیده کوفه اجراسین، تجدید ایلین یاتوب عباده
باخ گور دیمورم اوغول آناسین، محشردی دیار کربلاده
لیلا تک ایدن بو چولده، آلُ الَلهی بو عبادی قارداش
ای مظهر صنع حیّ یکتا، بو کرب و بلا یری منادور
هاجرده هانی مقام لیلا، اوغلی بونون اوغلونا فدادور
کعبه یری با شرفدور امّا، اونداندا شرفلی کربلادور
نه کعبه بهشت و عرشدنده، با رتبه بو کربلادی قارداش
ای ذبح عظیمه عمده معنا، وی باب نجات ماسوایه
ویردون ایله بیر فدای زیبا، فخر ایلوری کربلا مِنایه
بو قطعه به قطعه جسمه اعدا، قرآنی یازوبلار آیه آیه
علّت ندی بس ورق ورقدور، آیاتی جدا جدادی قارداش
گُل جسمینی منجنیق محنت، بو چولده خلیل تک سخوبدی
کِتفینده اولان بو تک جراحت، شمشاد قدین یره یخوبدی
امّا وورولوب او قدر ضربت، قرآن کیمی جلددن چخوبدی
بیر بیله خدنگ و تیغ و خنجر، بیر جسمه نجه روادی قارداش
گَلمزدی بو حیطه ی خیاله، شهزاده گیدن زمان جهاده
چون سرو خرام ایده جداله، صد پاره ولی گَله عباده
صیّاد بو محترم غزاله، بیر دام قوروب بو غم گُساره
آهوی خطایه ده حقیقت، بیر بیله جفا خطادی قارداش
مشتاق اولاندا آل طاها، اوز جدی رسول کردگاره
بیر بونلا تاپاردیلار تسلی، ایلردیلر اکبره نظاره
دوزسونله نجه بو غمده آیا، اکبرده اولوبدی پاره پاره
هجری بو جوانین اهل بیته، علّت اودی غم فزادی قارداش
هر بیر کسین اُلسه بیر عزیزی، جاریدی بونا جهاندا عادت
قویمازلا که چشم اشک ریزی، قان آغلیه ای شهِ ولایت
امّا بو جوان ریز ریزی، گورجک سنه ایلدی شمادت
شرم ایتمدی قانلی گوز یاشوندان، سعد اوغلی نه بی حیادی قارداش
گلزار وفاده جسم اکبر، بیر گُلدی که خاره توش اولوبدی
گُل تک بو گوزل بدن برادر، باشدان باشا خاریله دولوبدی
باشینده سکینه قاره معجر، آگاه اولالی بو گُل سولوبدی
پژمرده و بال و پر شکسته، بلبل تک ایشی نوادی قارداش
آهیم اودی عالم برینه، اوج ایلسه گور سپهر یانماز؟
بیر رنگه باتوب مه مدینه، هیچ لاله بو رنگیله بویانماز
تا وار نفسی قیزون سکینه، قارداش دیسه اکبریم اویانماز
صبر ایلمسه او بی قرینه، اُلدورسه اوزین به جادی قارداش
(سعدی زمان) بو آستانه، مستخدم پاک و بی ریادور
سن باب کرم شه زمانه، امّا او ملول بیر گدادور
غم قلبینی دوندَروبدی قانه، مشتاق طواف کربلادور
قانع دگل آز عطایه سندن، منظوری بیوک عطادی قارداش
- یکشنبه
- 4
- مهر
- 1400
- ساعت
- 15:36
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه