اربعينين دور گوز آچ اِيله عنايت يا حسين
قَبريوی زينب گلوب ائدسون زيارت يا حسين
گر چه زحمت دور وجودون ياره دور باشدان باشا
عفو قيل چاره م ندور چوخ دور علاقم قارداشا
بو علاقم دور سالان بير عمر يورقون داغ داشا
حشره تك وار منده بو عشق وارادت يا حسين
باش گوتور بير قَبردَن لطف اِئت باجون، قارداش گلوب
ناله سیندن نالیه چوللّردَه كی داغ داش گلوب
شام دَن كرب و بلايه يوللاری بير باش گلوب
سری وار دور ئولميوب قالدیم سلامت يا حسين
ئولمدیم قالدیم جهاندا رنجِ گوناگون گورم
نيزدَه سن ناقه دَه من دشت ايله هامون گورم
كوفه شهرين نا مُنظم شامی بی قانون گورم
رنگی دَن رنگه قالام ساعت به ساعت يا حسين
كربلادَه كاش اوگون مستور اوُليدی گوزلريم
پرده، پرده لخته قانيله دوليدی گوزلريم
گلشنی گورجك خزان گل تك سوليدی گوزلريم
گورمیديم سولدی گلزارِ ولايت يا حسين
هانسي مشگل دَن دئيوم گلمز سايا مشگل لريم
سولدی شام و كوفه دَه پاييز گورموش گل لريم
گلديلر نِی تك نوايه غصه دَن بلبل لريم
گورديلر گلشندَه يوخ ذوق و طراوت يا حسين
اهلِ شام و كوفه، بی فرهنگ دور فرهنگ دَه
تك ديلر دنيا يوزونده رنگ دَه نيرنگ دَه
گون لرين باشه وئريبلر بزمِ جنگ و جنگدَه
گوزلرين كور ايليوب رنگِ جَهالت يا حسين
آرزويه چاتماديم قالدی اوركدَه نسگليم
هانسی نسگلدن آچوم سوز شرحی نه گلمير ديليم
اوسته لندی غم، غم اوسته اولدی مين ،بير مشگليم
لحظه لحظه مشگلات اولدی زيادت يا حسين
يادِ عباس ايله خاطردَن چيخادديم هر غمی
شام دَه آچديم بوكولموش قانلی گوزگوز پرچمی
قبريوين شوقی ياراتدی منده اوز گه عالمي
باشلاديم يول باشدا سودای زيارت يا حسين
ذكرِ هُو حق باعث اولدی خالق امداد ايلدی
قيد دشمن دَن بيز اهلِ بيتی آزاد ايلدی
حضرتِ حق رحمتون مشمولِ سجاد ايلدی
كفری نابود ائتدی اعجازِ امامت يا حسين
سجدهُ شكر ايلرم اوز دولتِ اقبالی مه
چاتديم آخر دولتون دَن اوّلِ آمالی مه
هجر اوتوشدی وصله يئتديم مرحبا احوالی مه
چيخدی ياددان گوردوقوم رنج و ملامت ياحسين
آيريلوب مدتدی زينب سن كيمی دل داردن
كاسه كاسه قان اوُدوب هر لحظه هجرِ ياردن
كيم بيلور چكديم نلر بو مدتی اغياردَن
هر نفس غربت دَه گوردوم مين قيامت ياحسين
سالكِ كوی وفايه توشه سيزليق توشه دور
كيم علايق دَن گئچوب خرمن گوزونده خوشه دور
قَبر، دود گوشه اولار بو قَبر، آلتی گوشه دور
اوزگه عالم دَن ائدور قَبرين حكايت يا حسين
زينبه مين راز ائدور بو طرحِ قَبرین بر ملا
دفن اولوب پائين پادَه اكبرِ گلگون قبا
سينه وی گهواره ائتدون حشره تك بير مه لقا
آلتی آيليق اصغر ائتسون استراحت يا حسين
عالمِ امكاندا يوخدی قَبريوين ماهیتی
تك نه ماهیت، جلال و عزت وكیفیتی
خاصه بيماره شَفا دور بو مزارين تربتی
كيم ائدور هر درده درمان و طبابت ياحسين
ای طبيبِ دردِ عالم، ديدهُ خون باريله
كربلايه گلميشم بير قافله بيماريله
جمله بيماروق كرم قيل كاروان سالاريله
تك به تك درد اهلی یوخ ايله عنايت ياحسين
ملكِ عالم دَه نه عنوانه طبيبيم زندييم
بو حياتِ عاريت دَن من اوزوم شرمندييم
زينبون ئولسون نئجه سندن صورا پا يندييم
ئولدورر من ئولمسم دَه بوخجالت ياحسين
بوالعجب بير ماجرادَن اولموشام مبهوت من
علتين كشف ائت منه ای كاشفِ سرّ و عَلن
قبری قبرون دَن ابوالفضلين اوُزاق دوشموش ندن
وار نه حكمت قيل اوُزون رمز و اشارت ياحسين
اولمادی مشگين دَه سو، سقای آلِ بو تُراب
خجلتيندَن ائتدی بو آرامگاهی انتخاب
يا ادب ائتدی رعايت معرفت اولدی حجاب
فاش قيل سرّين ندور بُعد مَسافت ياحسين
قبرينی گورجك منه شرح ايلدی بير اوز گه حال
اصغرين گر گورمه سيديم قَبرين ايلرديم خيال
بو بالا قبر اصغرين دور، فكريمه گلسون محال
بو مزار ايچره ياتوب اول سَرو قامت ياحسين
بو چيچيك قَبر ايچره گوردوم بير بيوك دنيا ياتوب
ماسوالهی آتوب گوزدن بئله تنها ياتوب
شرم اولوب باعث دوشوب سندن اوزاق سقا ياتوب
مشگينی گوزگوز ائدوب تيرِ عَداوت ياحسين
عفو قيل درده گتوردوم قلبيوی ائتديم گله
غصه لر ناچار ائدوبدی يوخسا گلمزديم ديله
اوز گه عالم دَه گلوب شاماتيدن بو قافله
درد دل ائتماقدی قصديم نه شكايت ياحسين
ئولدی يوللاردا نئچه يول يورقونی يورقون بالان
دوشدی مين درده علاوه ئولميوب سالم قالان
اولمادی غربت ولايتده بيزی ياده سالان
هر كيمی گوردوق بيزه ائتدی جسارت ياحسين
بو جسارت باعث اولدی شامِ حسرت خانه دَه
اوزاليمله بير گُهر دفن ايلديم ويرانه دَه
عفو قيل اولسا قصوريم حفظ بو دُردانه دَه
چوخ تلاش ائتديم قالا سالم امانت ياحسين
جورِ دشمن ائتدی قهراً باغريمی قان شام دَه
باعث اولدی بير قيزون قالسون او ويران شام دَه
كربلا ظلمون جهانه ائتسون اعلان شام دَه
تا بولونسون نيليوب اهلِ شقاوت ياحسين
عشق سیز (شبخیز) چکمز ملکِ عالم دَه نفس
بو حقیقی عشق دور نه عشقِ صوری نه هوس
عشق، عشقِ اولیا دور عشق آل الله دی بس
اورگه بیر عشقه بو عشقیله نه حاجت یا حسین
- چهارشنبه
- 7
- مهر
- 1400
- ساعت
- 19:2
- نوشته شده توسط
- یوسف اکبری
ارسال دیدگاه