گر چه باجوون مقصدی گلدی اَله قارداش
مشکل بو مزار اوستونه بیرده گله قارداش
قوی سیدی بو بیمار بالام بوردا قالاردیم
قارداش سنون عطرون بو مَزارون دَن آلاردیم
گوزدن آنام اوغلی هامی دنیانی آتاردیم
بحر غمه سن سیز بو بیاباندا باتاردیم
تا باشه گلوب عمر کنارونده یاتاردیم
آیریلمادی بیر آن گوره لر بو باجی قارداش
بیر کیمسه منیم تک بوله لر اولمادی کُول باش
سندند صورا ایتسون نجه بس حوصله زینب
ممکن اولی گور بیرده جهاندا گوله زینب
ایکاش اجل ایمدی گلیدی ئوله زینب
بیمار یانوندا منه بیر قبر قازیدی
زینبدی حسین باجیسی قبر اوسته یازیدی
قارداش نجه گور آیریلی زینب بو چمندن
بو قبره قسم بول بو باجون دویمادی سندن
ای نازلو بالاسی آنامون اینجمه مندن
قارداش دیمه بیچاره باجون مقصدَه یتدی
یالقوز سنی بو چولدَه قویوب یثربه گتدی
منکه بو قدر ایمدی سنه ایلورم اصرار
اولما نگران امندی یوخ فرقۀ اشرار
بو دشت بلادن گیدوب او لشگر خونخوار
نه واردی قلج نیزه ویرانلار اوخ آتانلار
نه واردی جوانلار قانینی قانه قاتانلار
ای تشنه جگر لعنت اولا اهل عراقه
ایلوبله دچار بوباجوی درد و فراقه
وار گتماقا میلون منیلن دور بیر ایاته
قویما بو اوزون یولاری قارداش بیزی باش سیز
گورسونله حسین زینبی باش سیز سنی باش سیز
سندن صورا دنیانی حسین جان نئدرم من
هر صبح و مسا ناله و شیون ایدرم من
سن سیز وطنه گورنه یوزیلن گیدرم من
میلیم اودی چوخدور منه بو یر وطن اوُلسون
بو یرده منه قبر قازلسون کفن اوُلسون
آیریلدی بو زینب نه جلالیله وطندن
بیر بیله خیال ایتمزدی کیم سنه مندن
زینب قالا دنیاده ولی آیریلا سندن
بولمزله دولوبدور اورگیم قانیله قارداش
بعضیسی خیال ایلر اولوبدور بو اورک داش
سن ایله خبر اکبر و قاسم بونی بولسون
قارداش لاریمی بیر بیر اویات سن دئنه گلسون
با هم بیزیلن یولدا حسین جان هامی اولسون
گورسونله حسینون گلوری اهل و عیالی
ازّل که کیمین زینبوون واردی جلالی
ازّلده حسین چوخ واریدی جاه و جلالون
یغمایه ولی گتدی سنون مال و منالون
ایمدی وطنی قصد ایلیوب باشسیز عیالون
عبّاسه خبر ایتگله دوشسون یولا قارداش
بیز نابلدوخ یولّارا منلن اولا قارداش
گلزار نبینون گلی یاتما بو چمنده
قارداش دور ایاقه منلن دوش یولا سنده
آخر بولوسن خوردا قزون واردی وطنده
یول گوزلوری سویلور بابام ایمدی گله جاق دور
گر گیتمیسن واردی یقینیم ئوله جاق دور
منلن یارالی گر وطنه گیتمیه سن سن
آلسا خبر اول خوردا قزون بس نه دیوم من
گورسه منی سن سیز ایده جاق ناله و شیون
بیردن دیسه ای عمّه بابام هاردا قالوب دور
مدتدی بولورسن که گوزوم یولدا قالوب دور
قسمت اولا گر بیردَه وطن من بونی بولّم
گورسم ایووی بوشدی اِیله نالیه گلّم
وای قارداشیم ایوای دیرم آخری ئولّم
سن سیز او وطنده بو باجون کام آلاجاق دور
بولمم نقدر ئولمیاجاق صاق قالاجاق دور
بولمم نه ایدوم من یتیشن وقته وطنده
عباس آناسی قارداش حسین دیده گلنده
آیا سوروشا اوغلونی طاقت اولی منده
بیردن دیرم ای آنا کول باشیمه اولدی
اوغلانلارون اول چولده آنا گول کیمی سولدی
(شوری) بیله سوز بیر بیله ساعت اَله دوشمز
بیردَه او بلا چولدَه بیله قافله دوشمز
زینب اتگین دَن یاپشان مُشگله دوشمز
بیر گوشهء چشمی له سنه اِیت سه نظاره
عمّوندی سوزون دئ اولی تیز دردوه چاره
- چهارشنبه
- 7
- مهر
- 1400
- ساعت
- 19:23
- نوشته شده توسط
- یوسف اکبری
ارسال دیدگاه