غم هجرونده عجب اودلارا یاندیم آناجان
اشک تر دامنه توکمکدن اوساندیم آنا جان
آنام ایوای آنام ایوای آنام ایوای آنا وای...
هانی بیر اهل دل آگاه اولا درد دلیمه
من کیمی اود توتوب آهیمله یآنا نیسگیلیمه
آنا وای ناله سی ورد اولدی او قدری دیلیمه
آناسیز قالماقیمی آخر ایناندیم آناجا
ایلرم عالم محنتده من هر قدری خیال
بلکه بیر چاره تاپا رفع اولی اندوه و ملال
گورورم دردیمه درمان اولا عالم ده محال
دردیمین چاره سی اولمکده دی قاندیم آناجان
حیف من تک ئولومه مایل اولان ئولمزیمیش
آناسیز لیق نه یامان دور ایشیدن بولمزیمیش
آناسیز قیزلارین عالم ده یوزی گولمزیمیش
باخیب اوز حالیمه بو نکته نی آندیم آنا جان
قان اولان دیل ده که هر لحضه سنی یاد ائدیرم
اود دوتار قلبیمی ناله چکرم داد ائدیرم
گلم افغانه آچوب باشیمی فریاد ائدیرم
او قدر سس چکوب آخرده دایاندیم آناجان
دفتر غمده باخوب عالمیمی سیر ایده رم
اولونوب زینب آدی نقطه تک هر یرده رقم
قویدی پرگار تک حیرتده منی نقطه غم
خط سیریمده نقدری که دولاندیم آناجان
بس که سر منطق اولوب دیل ده آدون هر سوزومه
دانشوب صحبته گللم سنیله اوز اوزومه
نه بلادور باشیمه گلدی کول اولدی گوزومه
سن تک ایستکلی آنادان آرالاندیم آنا جان
دل بو حسرتله دونوب قانه، گلور جوشه آنا
بلکه بیر مرقد پاکون باسیم آغوشه آنا
گیتدیم هر بیر گئجه بو فکریله من هوشه آنا
نه یوخوم گلدی نه هوشیمده اویاندیم آناجان
خورد و خواب اولدی حرام ایلدیم از بسکه فغان
سنسیز آغلار گوزومه تیره و تار اولدی جهان
سرو قدیم بوکولوب اولدی اوشاقلیقدا کمان
باخیب اوز نفسیمه نفسیمدن اوتاندیم آناجان
کیمدی من تک آنا محنت کش اولا عالم آرا
سارالیب گول یوزی خون دلیله احمر اولا
آغاروب زلفی، اولا عمری گونی بختی قرا
خم محنتده عجب رنگه بویاندیم آناجان
(ذهنی) یاز زینب ایدوب بو دلیله شیون آنا
شعله ی آتش هجرانیده یاندیم من آنا
چکیلوب سینه مه مین داغ فراقوندان آنا
داغ هجریله اورکدن یارالاندیم آنا جان
- پنج شنبه
- 15
- مهر
- 1400
- ساعت
- 12:55
- نوشته شده توسط
- یوسف اکبری
- شاعر:
-
استاد مرحوم ذهنی
ارسال دیدگاه