سلام بِرار سلام تِه غم بمیرم
مِه مهربون امام تِه غم بمیرم
سلام مه جانِ مارِ یادگاری
مه قسمت بیه فقط بی قراری
حسین جان مِه دَم ونَفِس تِه قرون
بَوین خواخر بِمُو پِرِس تِه قرون
بِـمومه بـا تمام نا تِـوُونی
تِه قبر سر بِرارفاتِحه خونی
ته قبرسر هِنیشتِن مِره دَرده
برارجان دیگه اون زینب بَمِرده
دیگه بشکسه برار مه پروبال
مِره بکوشته خاطرات گودال
چی بَهووم چی بگذشته به زینب
برارجان نا که روز داشتمه ناشب
مِه دَم دَر بُورده تا اِینجه بِمُومِه
بدون ته دیگه مه عُمر تِمُومِه
اَتا روز داشتمه من شش تا بِرار
اَتا روز بَیمه بی بِرار گرفتار
اَتا روزداشتمه غُرور و اِحساس
اَتا روز بَیمه بی حسین وعباس
اَمان از شام واز دروازه ساعات
برار خَله بَکِشیمی مُکافات
اَمه سرمثل وارش سنگ وارسه
به جرم اینکه برار بیمی سادات
اگرچه این سفر پایان بَهیته
برارجان دیگه مِه جانِ بَهیته
حسین جان این سفرهرکِجِه شِیمه
فقط تِه وَچونِه نازه کَشیمه
تا خواسّنه تـازیـانه بَـخِرِن
سِـپَرِ بَـلای رُقَـیه بِیـمه
برار اصلا نَعُو چی بَیّه نَپِرس
هرچی پِرسِنی از رُقَیّه نَپرس
وِه ازبس که شیرین زبونی کرده
وِره چش هاکردنه وِه بَمرده
تِه شَرمندومه شرمنده بِمُومِه
رُقَیـّه بَـمردو زِنّـه بّـمُومه
تِه قَبرِ سَرخوامه حاجت بَهیرم
دعا هاکن که هَمینجه بَمیرم
مه دل تنگ هَسّه تِه بلا مِه سینه
تِه که دَنی چِتی بُورم مَدینه؟
بَخُون«مداح» بَخُون مِه دِلِ دَرده
بَخُون که دیگه اون زینب بَمرده
- دوشنبه
- 7
- شهریور
- 1401
- ساعت
- 10:4
- نوشته شده توسط
- محدثه محمدی
- شاعر:
-
علی اکبر اسفندیار (مداح)
ارسال دیدگاه