کربلا میعادگاهِ حیّ ذولمندور باجی
عشق قربانگاهیدور عشّاقه مدفندور باجی
اهلِ عشقه بیر مَقرّ عشقدور بو کربلا
ادّعای عشق ایدن عاشق گرک گورسون بلا
طالبِ حُبّ اولسا هر کیم البَلاء لِلولا
عالمه بو مسئله گون تک مبرهندور باجی
عالمه اثباتِ عشقین اهلِ عشق ایتسون گرک
شوقیله بو عرصه گهده کامینه یتسون گرک
محضرِ جانانه الده نقدِ جان گیتسون گرک
تا نشان ویرسون که عشقی وجهِ احسندور باجی
قصّهء عشقین بو یر آگاهیدور اسرارینه
تربتی مشتاقیدور عشق اهلینون دیدارینه
وعده گاهِ عشقدور یاری یتورسون یارینه
قربِ وصلت آختاران عشّاقه مسکندور باجی
بیعت اوسته بو چولون تنظیم اولوب هنگامه سی
ننگدور عشّاقه بیعت کلمه سی برنامه سی
گیمرم عریان اگر قالسامدا ذلّت جامه سی
عور قالماخ رختِ ذلّتدن مزیّندور باجی
اَدای عشق چوخ عاشق ایدوب بو داریده
نقص اولوب امّا مقدّس عشقی پای داریده
بعضی ارنی ، بعضی کَیفَ سویلیوب گفتارده
عشقه ارنی جوابی کلمهء لن دور باجی.
من حسینم رهگشایم عالمِ حریّته
سرورِ آزادگانم اگمرم باش ذلّته
گر کسیلسه اللریم حاشا ویرم ال بیعته
ظالمه تابع اولان مظلومه دشمندور باجی
یل اسر آفت یتر بو چولده گل یپراقینه
ابرِ ظلمت یاغدیرار قان ، قتلگاه توپراقینه
باخما شاماته گیدنده آتلارین دیرناقینه
دوزمه سن قانیله گر گورسن مُلوَّندور باجی
من ازل گونده بلا پیمانه سین نوش ایتمیشم
آل طاهانی فراقیمده سیه پوش ایتمیشم
طالبِ وصلم چراغِ هجری خاموش ایتمیشم
راهِ عشق و عاشقی پُر نور و روشندور باجی
عشقِ مافیهانی باشدان آتماسام اولماز باجی
تشنه لب دین اوسته قانه باتماسام اولماز باجی
اوچ گجه گوندوز قوم اوسته یاتماسام اولماز باجی
اهلِ عشقه قانلی قوملار اوستی مأمندور باجی
آتمیشام دنیانی گوزدن وصلِ یاره مایلم
هر نقدری یاره اوستن دگسه یاره مایلم
اولسا جسمیم قطعه قطعه ، پاره پاره مایلم
شورِ عشقیله ایله مملو بو تَندور باجی
خاطریم تاپماز تسلّی عشقیله دینجلمسه
زهرلی پبکان مکانِ لامکانی دلمسه
قتلگاهه باش آچوخ جدّیم پیمبر گلمسه
نقص اولار عشقیم کمالی پر مثمّندور باجی
یتمز عاشق کامه تارِ مهرِ جانی کسمسه
اولماز الفت جسمدن روحِ روانی کسمسه
اللرین گودالیده اوز ساربانی کسمسه
ثابت اولماز عالمه عشقی مُبیّندور باجی
ایتمیشم سود و زیانین من بو سودانین قبول
نقدِ جان ویرم بهاده ایتمرم هرگز نکول
سینمی سیندیرسا سیندیرسون باجی سُمّ خیول
گر چه عِلمِ یکون و کانه مخزندور باجی
انبیا حیران قالوب یکسر رموزِ عشقیمه
باغلانان پیمانیمه اسرارِ روزِ عشقیمه
یانسون عالَم اهلی بیر دنیا بو سوزِ عشقیمه
یانسا کیم یانسون ، یانان یانماقدان ایمندور باجی
شوقیله بو درگهه (عبدی) گلوبدور روزِ عید
عیدیانه ایستوری ای کانِ جودی بی عدید
بابِ رحمتدن اونی قیترمه زینب ناامید
قیل کرم ، حقدن اگر بیر پای معیّندور باجی
- سه شنبه
- 27
- تیر
- 1402
- ساعت
- 16:45
- نوشته شده توسط
- یوسف اکبری
- شاعر:
-
مرحوم عبدی قراملکی
ارسال دیدگاه