علی او خُطبه دور کی هر مناره دن حلول ائدر
علی حکومت ایلسه مطابقِ اصول ائدر
علی او شه دی کی اگر جهانی وئرسه لر اونا
نه ظلمیدن گوزون یومار نه حقیدن عدول ائدر
مقامه باخ کی رتبه سی کچوبدی آسمانلاری
امامه باخ کی وصفینی خدائیلن رسول ائدر
دلیلی وار کی خیبری بیر اَللی قالخیزار گویه
قنوته قالخیزاندا اَل، اونی دعا بتول ائدر
قویاندا سجدیه باشین دیئنده ربّی العظیم
فرشته لر خضوعیلن حضورینه نزول ائدر
عجایبین خزینه سی مناقبین مدینه سی
جهاندا هر نه ایلسه محیرُ العقول ائدر
علینی چوخلار ایستیور جهاندا چوخدی عاشقی
ولی اونون عدالتی چوخ "عاشقی" ملول ائدر!!!
علی اگر بو گون گلوب پیاده ائتسه عدلینی
نه سنّی لر باش اَندیرر نه شیعه لر قبول ائدر
"وفا" او مکتبی ئوز موسسیندن آیریلا
عقایدی برعکس اولار قدم قدم اُفول ائدر
- دوشنبه
- 16
- مرداد
- 1402
- ساعت
- 22:23
- نوشته شده توسط
- یوسف اکبری
- شاعر:
-
وفا منافی اردبیلی
ارسال دیدگاه