رسم عالمدور گولی آفت خزان اِیلر علی
گر گوله یِتسه خزان بلبل فغان اِیلر علی
نوک نٕی ده ای منیم آفت گورن پَرپَر گولوم
یا منی دیندیر جِدادن، یا دعا اِیله ئولوم
گورسَنوب مَندن قصور آیا، بویور تا من بولوم ؟
کیم آناسیندان اورک دردین نهان اِیلر علی
گل عذارینده واروندور قرمزی قاندان نقاب
سَسلیرم سَس ویرمیسَن قلبیم اولور غمدن کباب
بیر دئمورسَن آیریلقدان آز قالور ئولسون رباب
عاقبت تیر غمون قلبی نشان اِیلر علی
سن اوزون نوک جداده اِیلیسن طیّ طَریق
عشقیوه حیران قالوب پیغمبر عهد عتیق
منده عریان ناقه ده بحر مصیباته غریق
صبریمی آخر مصیباتون تالان اِیلر علی
اِیلوسن زمرهَ ملایکله جِداده قیل و قال
ای منیم اِیستَکلی دلداریم اگر تاپسان مجال
نیزه دن باخ گور نجّه، قَدیم اولوب هجرونده دال
آیریلیق دردی یاماندی باغری قان اِیلر علی
بولمزیدیم اوچ پر اوخ آمالیمی اِیلر هدر
اوخلانارسان قلب میداندان گلر غملی خبر
هیچ بولورسن اوخلانان دَمده اوغول چَکدیم نَلر
ناگهان گوردوم که عَمه ن الامان اِیلر علی
بیله فکر اِیتمه که من، سَن اوخلاناندا بولمدیم
نچّه یول ئولدوم دیریلدیم کیم دِئیر من ئولمدیم
کربلایه تا قدم قویدوم او چولده گولمدیم
اِیستسه هر نِینَیه دور زمان اِیلر علی
اوچ گیجه گوندوز او چولده اِیلدوخ آه و نوا
سن سویا خاطر ولی من شدت غمدن بالا
تیتریردی ناله میزدن سرزمین کربلا
کیمسه بیز تک ناله اوچ گون، همزمان ایلر علی
کربلاده سو دالیجا کیم دئیر که قاچمادیم
یا غمونده تیر غم بو داغلی قلبه ساچمادیم
نیسکیل اولدی باغلادیم قولارون امّا آچمادیم
بو غمه دل داشدان اولسا گور توان اِیلر علی
آلدی تا مَندن سنی اول سرور و سالار عشق
باغرینا باسدی او لحظه قُلزم ذَخّار عشق
باشلانوب سَنله دوباره گرمی بازار عشق
عهدینه ایفا اِیدن سود و زیان اِیلر علی
تا سَبوی عشقیله، ساقی مَستان اولدی مَست
قانیوی آتدی گویه میداندا پیر می پرست
لازمیدی اولسون امضا نامه روز اَلست
هر گون آخشاملار شفق شرحین بیان ایلر علی
- دوشنبه
- 16
- مرداد
- 1402
- ساعت
- 22:33
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه