ای گل گلشن طاها ولدی یا ولدی
هاردا وار بو گل زیبا ولدی یا ولدی
هانسی گُلده گورونوبدور بو طراوت، بیله رنگ
بیله پامال ایلیوب هانسی گُلی خار خدنگ؟
هانسی با غی سولانون من تک اولوب شهدی شرنگ؟
دا غیدوب گلشنین اعدا، ولدی یا ولدی
ایله بیر خار چکوب قلبیمه بو قوم ضلال
گوره دنیا بویی بیر لاله بیله داغ، محال
باخ سنق قلبیمه گَل نطقه دانیش گوگلیمی آل
ای منه سرّ سویدا، ولدی یا ولدی
قطره قطره دوزولوب قان یوزیوه ژاله کیمی
مه یوزون چولقالیوب زلف سَرون هاله کیمی
دا غیلوب گُل بدنون برگ گل لاله کیمی
بَزَنوب دامن صحرا، ولدی یا ولدی
نجه قانون کیمی گوز یاشیم اوغول قان اولماز؟
بو نه عالمدی بیله صحن گلستان اولماز
صحن گُلزارده هیچ گُل بیله خندان اولماز
قاریشوب توپراقا اعضا، ولدی یا ولدی
ای قویان تک منی نازیله قوری یِرده یاتان
آند اولا جانیوه جان اوسته دی بو یالقوز آتان
چوخ جوان وار رهِ جاناندا بو گون قانه باتان
لیک یوخدور سنه همتا، ولدی یا ولدی
حالیمی یوخدی بُلن، بیر بُلوری غیبی بُلن
واردی بیر عدّه یانان حالیمه، بیر عدّه گُلن
اَلوم آختارماز اوغول یوخسا جوان اوغلی اُلن؟
کاش اُلم قالمیام اصلاً، ولدی یا ولدی
گوزیمون نوری عجب سالدون ایشیقدان گوزیمی
قویموشام بیله که قانلو یوزیوه من یوزیمی
گَلسون ای کاش اجل قویسون آ غیزدا سوزیمی
سنیله باهم اُلم تا، ولدی یا ولدی
یارالار گلشن جسمونده قزل گُلدور اوغول
بیرده گُل گلشنِ عمریم گُلینی گُلدور اوغول
صون نفسده آتاوا درد دلون بُلدور اوغول
وار سوزون ایلمه اخفا، ولدی یا ولدی
اوزین اُلدورسه آنان وار یِری ای ماه تمام
سنی اُلدوردولر اولدی گوزینه گوندوز شام
دور اَلون ویر اَلیمه منله ایداخ عزم خیام
بیرده گورسون سنی لیلا، ولدی یا ولدی
بو جهاندا منیم امید حیاتیم سنیدون
والی عهدیمیدون، ملک ثباتیم سنیدون
لنگر عمریمیدون، فُلک نجاتیم سنیدون
گوزوم اولماز نجه دریا، ولدی یا ولدی
بو گوزل گوزلره قربان اگر آچسان گوزیوی
حالیمی گورسن اوغول گوزدن آتارسان اوزیوی
قوی دیزیم اوسته، قوری یِرلره قویما یوزیوی
ایتموسن ایستی گون ایذاء، ولدی یا ولدی
بیزه { سعدی زمان }خادم صادقدور اوغول
دست جودیمده گوزی لطفیمه شائقدور اوغول
اوزی بی ریب و ریا خدمتی لایقدور اوغول
ایلرم عزّته دارا، ولدی یا ولدی
- سه شنبه
- 17
- مرداد
- 1402
- ساعت
- 0:13
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه