جنگه گلور اُمُّ بنینون یَلی
گوردوله سسلور اوجادان یاعلی
طوفان سالوبدی_میداندا سقا
احسن بویوردی_عباسه زهرا
جانم ابوالفضل_جانم ابوالفضل(۲)
_
حمزه یه اوخشور اوجابوی قامتی
حیدره بنزور یریشی،هیبتی
جعفری حیرتده قویوب صولتی
پرچم الینده گویه گیتدی اَلی
سقانی گوردی_قورخوشدی اعدا
احسن بویوردی_عباسه زهرا
جانم ابوالفضل _ جانم ابوالفضل(۲)
___
تلّیده شاهددی امام زمان
گوردی گیدور رزمه قوی پهلوان
اَنّی کورک،بیر آلا گوز قهرمان
نور خدادن ئورگی منجلی
میدانه چاتدی_باشلاندی دعوا
احسن بویوردی_عباسه زهرا
جانم ابوالفضل_جانم ابوالفضل(۲)
___
هر قدم آتدوقجا اونون مرکبی
تیتروری میدان_تز آلور مطلبی
شاد ائلییوبدی باجیسی زینبی
نور رُخی،آل عبا مشعلی
عشق ایلییوردی_باخدوقجا مولا
احسن بویوردی_عباسه زهرا
جانم ابوالفضل_جانم ابوالفضل(۲)
___
گلشن زهراده گل یاسه باخ
بیر طرفه، فرقه ی خَنّاسه باخ
سس اوجالوب قان توکن عباسه باخ
قان بورویوب قورخولی بیر مقتلی
ساقیِّ طفلان_ایلوبدی غوغا
احسن بویوردی_عباسه زهرا
جانم ابوالفضل_جانم ابوالفضل(۲)
_
اگمدی باش ذلته عباس آقا
ویردی بها غیرته عباس آقا
چاتدی گوزل عزته عباس آقا
بو پسر ام بنیندور بلی
قانیله دولدی_میدان هیجا
احسن بویوردی_عباسه زهرا
جانم ابوالفضل_جانم ابوالفضل(۲)
____
سویلدی من ماردی سیندیرمیشام
خرمن اهریمنه اود ویرمیشام
شمرین امان نامه سینی جیرمیشام
عرشی دوتوب،فرشیده صوت جلی
عباسین آدین_سسلندی دنیا
احسن بویوردی_عباسه زهرا
جانم ابوالفضل_جانم ابوالفضل(۲)
_
ساخلادی ئوز قارداشینا احترام
سویلدی سن شاهیسن ای ذوالکرام
فخر ائدرم من سنه اولدوم غلام
عدنیده شاد ائتدی دل مُرسَلی
بیم و هراسی_یوخ دیلده اصلا
احسن بویوردی_عباسه زهرا
جانم ابوالفضل_جانم ابوالفضل(۲)
__
قرص قمردی،بو وفا کانیدی
منسبی وار باادب انسانیدی
ساقیدی اما لبی عطشانیدی
ساقیده اولسا سودان ایچمز ولی...
سقادن اولدی_شرمنده دریا
احسن بویوردی_عباسه زهرا
جانم ابوالفضل_جانم ابوالفضل(۲)
- چهارشنبه
- 18
- مرداد
- 1402
- ساعت
- 1:8
- نوشته شده توسط
- یوسف اکبری
- شاعر:
-
بهلول حبیبی زنجانی
ارسال دیدگاه