میداندان دانیش

* 

چون یئتیشدین قطره تک دریایه طوفاندان دانیش

عشقلر دریاسی ساحلسیزدی عرفاندان دانیش

عؤمریوین آیینه سین پاک ساخلا  وجداندان دانیش

موج موج اعمال و تکلیفِ مسلماندان دانیش

شیطانا باج وئرمه ییب جرعتله میداندان دانیش

*

ای کؤنول بی درد وغم، مرهم سوراغین دوتما گَل

خلقه خدمت ایسته سن، ایمانی یعنی آتما گَل

دونیا بازارینده انصافی مقامه ساتما گل

صُبح «مهدی» سَسله ییب، آخشام نامازسیز یاتما گل

عشق دردین درک  ائیله  سونرا  درماندان دانیش

*

سن یازیقلار دردینی گؤرجک روانون اَسمه سه

قویماسان بازارِ کاردا فرق یاخشیله پیسه

گیرمه مئیدانه ، روان اولما مقدّس مجلسه

قورخورام پیغمبر اوغلی قهر ائدیب سندن کوسه

امر  ائده  لال اوُل نه آلله دان نه شیطاندان دانیش!

*

لطف قیل  سن یوسف کنعانه بنزه تمه اونی

بی مَثَل دیر شاه یا سولطانه بنزه تمه اونی

هیچ بیر ارباب و هئچ  بیرخانه بنزه تمه اونی

حتّی بو یئرده گئنیش عمّانه بنزه تمه اونی

سؤز دوشنده «مهدی» دن، خلّاقِ رحماندان دانیش!

*

خالقیم موعود گونی بیر آن جهانی تنگ ائده ر

چونکی تصمیم، آخرین تصمیم دی، ساعت هنگ ائده ر

نور جوش ائیلیب قرانلیق لحظه لرله جنگ ائده ر

بی ریا عاشقلری صاحب زمان(عج) سرهنگ ائده ر

بی ریا اوُل، خالص اوُل، عشقیله جاناندان دانیش!

*

چون هدف سنگین دی دونیاده اولور حجّت تمام،

قطعاً آلله دا اؤزی بو عرصه ده ائیله ر قیام

تا کی عالم گؤرسه ده مهدیِ عشقه  احترام

السّلام ای قدرتِ حق، صاحب عصر، السّلام!

گل ظهور ائیلیب بیزه اتمامِ هجراندان دانیش!

*

سنسیز ای آقا جهانین  یوخ صفا و لذّتی

هئی آچیب سولماقدی بو گولشنده گوللر عادتی

سنده سولماق یوخدوسا، گؤرستسن اوُل قد – قامتی

اقتدا ائیله ر سنه  دونیاده  محروم مللتی

یالوارار آچ گول دوداغین، باغ و بُستاندان دانیش...!

دادا بیلوردی