خوش گلموسن بو ئولکیه ای خوش قدم قوناق!
باشدان باشا قم اولدی سنیله حرم، قوناق!
(همسایه سایه ات به سرم مستدام باد)
کولگون باشیمدان اولماسین عمریمجه کم، قوناق!
شهر قما گلن گونووی بیز اونوتماروق
واجبدی حُرمتون بیزه ای محترم قوناق!
سندن قاباق کویریدی بو گورملی دیار
گولّندی سن گلنده بو یئر دمبدم قوناق!
چوخ گورمشوق کرامتیوی بیز بو شهریده
سن سن کریمه عترته، ای ذوالکرم قوناق!
از بس گوزلدی گنبد و گلدسته و ضریح
دوشمز بو یئرده یادمه باغ ارم، قوناق!
پیغمبرین قیزیل گولونون عطری سنده وار
ای هر جهتدن حضرت زهرا شِیَم قوناق!
شاهلار گدا کیمی باش اگور آستانه وه
قاف کرامت اوسته ووروبسان علَم قوناق!
عفو ائت قوناق دئدیم سنه، سن ائو صاحابی سان
هم ائو صاحابی سان بیزه بو یئرده هم قوناق
هاردا سنون کیمی قوناق تاپیلار میزبان اولا
حاشا تاپیلسین، آدیوه اولسون قسم قوناق!
عرض ایلروق رضا باجیسی! اشفعی لنا
ای قارداشین یولوندا اولان قدّی خم قوناق!
قم اهلینون قوناقی غم و غصّه چوخ گوروب
یارب! گوروم کی گورمه سین هئچ درد و غم قوناق
چوخداندی کی گویرچین اولوب قان اولان اورَک
گویلوم چوخ ایستیور حرمه چوخ گلَم قوناق
عمرون آز اولدی گول کیمی، دردون یازان زمان
دفتر سیزیلدار آهیله، آغلار قلم، قوناق!
دامجی دنیزی وصف ائده بیلسون محالدور
بیر نمدی شعریم ای شرف و شأنی یم قوناق!
«سیّدبشیر»ین عرضی بودور گل عنایت ائت
اوزگه دیاره قویما بو قومدان گئدم، قوناق!
- پنج شنبه
- 19
- فروردین
- 1400
- ساعت
- 12:26
- نوشته شده توسط
- یوسف اکبری
