ای نائب پیغمبر احسن سنه یاحیدر
ای میر عدالتگر احسن سنه یاحیدر
ای محترم برتر احسن سنه یاحیدر
مدحیله مجللدی دفتر سنین عشقینده
تاپدی اورگیم حقه باور سنین عشقینده
برپا اولاجاق بیر گون محشر سنین عشقینده
جنت سنین عشقینده کوثر سنین عشقینده
قلباً ائلدیم باور احسن سنه یاحیدر
مجلسده سکوت اولماز گر منده بیان اولسا
جانلاره خطر قالماز گر سندن امان اولسا
عشقینده ائدر محشر عاشقده نشان اولسا
دنیا دولوسی اما سلطانیله خان اولسا
کیمدور کی سنه بنزر احسن سنه یا حیدر
آئین هدایتده سلطان هدا سن سن
میدان شجاعتده شمشیرخدا سن سن
محراب عبادتده الگوی فدا سن سن
میرعرفا سن سن فخر شهدا سن سن
ای مرد عنایت گر احسن سنه یاحیدر
سنسیز بیزه عالمده هئچ عصر صفا اولماز
حاجات و تمنّامیز هئچ یرده روا اولماز
گر اولماسا الطافین هئچ درده دوا اولماز
سن تک ایکی عالمده مولا و آقا اولماز
یازدیم ائلدیم باور احسن سنه یاحیدر
عالم ره عرفاندا اورگشدی هدف سندن
هر کیمده شرافت وار کسب ائتدی شرف سندن
فخر ایلدی دنیایه وادی نجف سندن
عباس و حسین اولدی شایسته خلف سندن
سنلن یارانار محشر احسن سنه یاحیدر
بو عرض ارادتلر آثار علایقدی
من یازدیقیم احسنلر هاردان سیزه لایقدی
بو بندی ائدر تائید کیم مرد حقایقدی
بیز مدّعیوک اما زهرا سنه عاشقدی
زهرادی سنه زیور احسن سنه یا حیدر
درس آلدی حسن سندن بو یولدا قدم ویردی
ظلماتی حسین اوغلون نوریله بهم ویردی
زینبده ستمگاهه فریاد عدم ویردی
غیرتلی ابوالفضلین تاریخه علم ویردی
ای میر علم پرور احسن سنه یاحیدر
اما شب احیانی احیا ائلدین گئتدین
پرونده ی ایثاری امضا ائلدین گئتدین
اوصاف شب قدری معنا ائلدین گئتدین
گوزیاشلارین هجرینده دریا ائلدین گتدین
ای ساقی هر کوثر احسن سنه یاحیدر
حتی بوشب قدری ماتم ائدیب هجرانین
جوشه گتورر قانی محرابه آخان قانین
بیر درده دچار اولدون تاپیلمادی درمانین
بیر یولدا اله دوشمز تاریخده دامانین
عرض ایلر هامی مضطر احسن سنه یاحیدر
محرابیده ظلمیله دگدی سنه بیر یاره
اول بیر یارادان قالدی عاشقلرین آواره
اول یاره حسینیندن دگدی نچه مین باره
زینبده ائدنمیردی او یاره لره چاره
گلزارین اولوب پرپر احسن سنه یاحیدر
گر بیر یارا اولسیدی زینب اونی باغلاردی
بیر دشمنین اولسیدی بیر الّیده ساخلاردی
بیر یاره لی اولسیدی جان مثلی قوجاقلاردی
امنیت اولیدی گر هر بیر غمه آغلاردی
بیر دشتیدی بیر لشگر احسن سنه یاحیدر
- چهارشنبه
- 24
- بهمن
- 1397
- ساعت
- 14:15
- نوشته شده توسط
- ابوالفضل عابدی پور
- شاعر:
-
کربلایی احد ظهرابزاده
ارسال دیدگاه