بخش 1
بلالی باشوون بشر قباقدا چوخ بلاسی وار
جهان بلادی سربسر یالانچی بیرجلاسی وار
بو مادرِ دنی صفت مینین دوغور مینین بوغور
داغتدی دودمانلاری نه شرم ونه حیاسی وار
سنیله آشنا دگول بو روزگار فتنه گر
بَزَکلی اژدها کیمی نه صلح ونه صفاسی وار
تمثیل
نراقی بیر مثل یازار جواهر کلامیدور
قیزیل سوئیلا ثبت اولار مثالنون بهاسی وار
جهانی فرض ایدور قوئی بیریسی ایپدن آسلانوب
یاواش یاواش اَنُور گورور دیبینده اژدهاسی وار
او ایپ که آسلانوب گورور ایکی سیچان ییور ایپی
سیچانلارون بیریسی‌آغ بیریسینون قراسی وار
ایپی ییوبله نصفیدن کچوبدی آز قالور دوشه
اگر قیریلسا گور بونون باشندا نه بلاسی وار
آچوبدی آغزین اژدها بو بختی قاره نیلَسون
اوزون کناره چکمگه بونون گورون هاراسی وار
باخورگورور او حالیده قاباقدا پُهره بال قویوب
ورور بال اوسته بیر بیرین مگسلرون نواسی وار
او بال همین بو مالیدور مگس لر اهلِ روزگار
ورولّا بیر بیرین بشرنه خوف و نه هراسی وار
قوئی همان جهانیدور یاپیشدیغی ایپ عمریدور
ایکی سیچان دیوم ندور هم آغدی هم قراسی وار
بیری گجه بیری گونوز ییّوله عمری متّصل
کسوبله عمری آز قالور قیریلسا ماجراسی وار
او اژدها که گورسنور یاتوبدی قعر چاهیده
اوخوفناک قبریدور بلاسی وار بلاسی وار
کسیلدی‌عمرون‌آی‌بشر بش‌آلتی ساپدان آسلانوب
دولان او اژدهایه باخ خطاسی وار خطاسی وار
نه عمرینون قیریلماغین نه قاره گونلرین گورور
نه اژدهانی درک ایدور نه قبره اعتناسی وار
ازل که ایستیور بشر اولا گناهه مرتکب
اورک دوشر طلاطمه گورر که چوخ هراسی وار
ایکیمجی ده جری اولار حدود حقّیدن چخار
گورر که قوخمیور داخی گناهه اشتهاسی وار
اوچومجی دفعه ایلَسه سینار تمام سدّیلر
دیمز نظام عالَمون غضبلی بیر خداسی وار
تمرّد ایلسون اگر او یرده ایله گورمسون
اویر هایاندی گورمیه یرون گوون هاراسی وار
بابام تمرّد ایلدی بهشتیدن چخارتدیلار
اونون یری بهشتیدی هوای جانفزاسی وار
بهشتی ساتدی بوغدیابیزی گتوردی غربته
بوغربتون صفاسی یوخ وفاسی یوخ جفاسی وار
اودور که اَلَّشور بشر جهانی ایلسون بهشت
جهان بهشت اولا دَگول ایچینده مین بلاسی وار
گیدور چخور ستاریه گزور بهشته یول تاپا
اگر مین ایل گیدوب گزه تاپانماز ادّعاسی وار
وحشت قبر
بهشته قبریدن گیدر کِچَر دیار برزخه
او برزخیکه یولّاری اوزاقدی چوخ هراسی وار
نقدری یاخشی دوست اولا یامان گونونده تز قاچار
رفیق اولار او شخصیلن جیبینده اسکناسی وار
تصوّر ایله سون سنه اوغولدا آشنا دگول
ایونده اهل بیتوون وفاسی یوخ جفاسی وار
ائشیتمیشم ویروردی جان قباق زماندا بیرنفر
اوغول چخارتدی دیشلرین نچونکه بیر طلاسی وار
امان او وقتیدن گلر اجل تری جبینووه
آخوب تمام گیزلنر گوزونده کی قراسی وار
ایلیکه آخدی گوزلرون باخوب ائو اهلی قورخوشار
نچونکه نسل آدمون جنازه دن هراسی وار
آغاج سناندا سسلنر صداسی الفراقیدور
او آیریلیق صداسیدور صداسینون نواسی وار
ائویندن آیریلوب گیدور بیر آیری ائوده قالماقا
او ایو بیر ایودی قورخولی نه فرشی نه اساسی وار
یغوبدی مال دولتی حقوق حق ویریلمیوب
حلال اولا حسیابی وار حرام اولا جزاسی وار
ایلیکه گیتدی توپراقا دوزولدی داشلار اوستونه
قنلوق ایوده قالدی تک باشیندا ماجراسی وار
دِیَر کنار ایدون منی ویروم تمام ثروتی
بو خوفناک منزلون ئورک سخان هواسی وار
دونَمّیور ساقا صولا او قدری تنگیدور مکان
دوروب اوتورسا آلننا دَگَن داشون یاراسی وار
نه دربی وار نه پنجره نه بیر نفس چخان یری
قالوب او یالقیز ایوده تک نه خویش و اقرباسی وار
تمام دوره قونشودور ولی گلوب گیدن هانی
گلوب گیدن او منزله ایلاندی چوخ خطاسی وار
وجود پاکه ای بشر بو قبر طوی اطاقیدور
خوشا او شخصه که انون نمازی وار دعاسی وار
گلون او طوی اطاقینه چراغ و فرش گوندرون
دالونجا یولّاماز اوغول باشیندا طوی هواسی وار
تمثیل
ئولوردی بیر نفر کیشی وصیت ایتدی اوغلونا
منه نماز قیلدیرون نمازیمون قضاسی وار
آیردی ویردی اوغلونا او پول که واجباتیدی
دیدی ویرون نمازیمه آتاوون التماسی وار
بو پوللاری چراغ ایدون منیم دالیمجا گوندرون
قرنقلوخدی یوللاریم او یوللارین هراسی وار
تصادفاً شفا تاپوب دیریلدی دوردی ئولمدی
گلوب قوناق چاغردیلار قوناقلیقون صفاسی وار
دیدی همان او اوغلونا الونده بیر فَنَر گوتور
قرنقلوخدی کوچه لر یولون قرا لباسی وار
ایلیکه دوشدولر یولا اوغول دایاندی اون قدم
آتاسی یول گیدنمدی الینده ده عصاسی وار
بخش 2
دئدی اوغول دایانما گل گورنمورم قباقیمی
قالوبسان اون قدم دالی چراغوون نماسی وار
چراغ گلر قباقیده نه اینکه اون قدم دالی
یخیللام ایندی توپراقا یخیلماقون بلاسی وار
دئدی آتا یادوندادور او گون که سن مریضیدون
دیدون چراغ گوندرون نمازیمون قضاسی وار؟
ئوزون چراغ آپارمادون چراغی دالدان ایستدون
او دال گلن چراغیوون نه نوری نه جلاسی وار
تاپوبسان ایندی که شفا ئوزون آپار چراغیوی
یاترتما بانگا پوللاری او پوللارین خطاسی وار
ولادت حضرت علی علیه السلام
قویاق بو یرده مطلبی گیدک علی سراغینه
گناهکار دردینه او درگهون دواسی وار
جناب مریم ایستدی دوغا مسیحی بیتیده
ندا یتیشدی زادگه دگول بو یر بهاسی وار
بیر آیری یرده وضع حمل قیل او نور پاکیوی
بو وادی مقدسون مقام کبریاسی وار
علی آناسی ایستدی علینی وضع حمل ایده
یاریلدی کعبه نون ایوی گوروب حقون صداسی وار
محبت ایله قوی قدم گتور وجوده نوریمی
او نور پاکیلن بو بیت اعظمون جلاسی وار
قدم قویاندا گوردی دورت خانمدی ماه پاره تک
او بانوی مقدسه سلام و مرحباسی وار
ملک لر اولدی قابله وجوده گلدی نور حق
ایشیقلی بیر چراغ تک تجلیّ ضیاسی وار
زیارت ایتدی حوریلر دوباره غایب اولدولار
آناسی گوردی اوغلونون بهشتیدن لباسی وار
گوتوردی باسدی باغرینا گوروب یوموخدی گوزلری
دئدی الهی اولمیا گوزونده ابتلاسی وار
دوباره کعبه نون ائوی یاریلدی چخدی فاطمه
نه گوردولر قوجاقدا بیر ایشیقلی آی پاراسی وار
آتاسی آلدی ایگلدی گئنه علی گوز آچمادی
ئوپوب زیارت ایلدی نقدری اقرباسی وار
پیمبرون قوجاقینه گلونجه یومدی گوزلرون
پیمبر آلدی گوردی بیر جمال مه لقاسی وار
بفوری آچدی گوزلرون باخوب جمال حضرته
او عاشقانه باخماقون نشان ویرور وفاسی وار
ازدواج حضرت علی (ع) و حضرت زهرا (س)
دولاندی روزگاریلر گلوب اون آلتی سنّینه
ایشیقلانوردی آی کیمی شجاعت و سخاسی وار
کبین کسیلدی عرشیده بزندی آسمانیلر
علینی گوردیلر هامی گیوبدی طوی لباسی وار
بودور عزیز کبریا بودور چراغ رهنما
بودور وصیّ مصطفی بودور امام مقتدا
بودور عدوّیچون بلا بودور محبّیچون شفا
بودور رموز هل اتی بودور خزینۀ عطا
بودور وسیلۀ دعا بودور قلوبیچون جلا
بودور فنا بودور بقا بودور امیر اولیا
بودور سرور سینۀ جناب ختم الانبیا
سنون او طوی لباسیوه تمام شیعه لر فدا
گئدون چخون فلک لره گلون گزون ممالکی
گورون که هانسی ملتون بو نوعی رهنماسی وار
مدینه نون خانملاری حجاز لحنی اوخشادی
عروس اولوبدی فاطمه الینده طوی حناسی وار
اوخوردی عندلیب لر اوجالدی صوت نغمه جات
هواده وقشلارون عجب صدای دلگشاسی وار
داغون دالیندا باتدی گون هوا قیزاردی قان کیمی
شفقده گیدی قرمزی نچونکه طوی اساسی وار
ایلیکه دالدالاندی گون علی ائوینده چخدی آی
بو آیدی یوخ عروسیدور جمال حق نماسی وار
نه آی نه گون گرک دوشه ستاره لر ایاقینه
بو بیر عروسیدور بونون حسین کیمی بالاسی وار
جناب ختم الانبیا گلوب زفاف اطاقینه
صولوندا اوتدی فاطمه صاقیندا مرتضاسی وار
بویوردی یا علی بیر آز اوجالت گوروم عمامه وی
عمامه قوزاناندا گوردی گون کیمی جلاسی وار
عروس اطاقی نور آلوب اوجالدی یدّی رنگ نور
باخان دییردی عالمون زبرجد و طلاسی وار
دونوب بویوردی فاطمه قاریشدی نوره نوریلر
اون ایکی رنگ نوریدی اون ایکی رهنماسی وار
عروسی ویردی ال اله بویوردی باخ عم اوغلی جان
بو بیر عروسیدور خدا یانیندا چوخ بهاسی وار
نظاره قیل عروسیوه منیم امانتیمدی بو
نه سینمیوبدی قوللاری نه سینه ده یاراسی وار
هجوم به خانه وحی
آمان او وقته ای خدا اوجالدی زینبون سسی
آنام یخلدی گل بابا یانقلی آه و واسی وار
یتیشدی گوردی مرتضا پیمبرون امانتی
یوزون قویوبدی توپراقا حزین حزین نواسی وار
گوتوردی چالدی توپراقا او ظالم ستمگری
باشین کسنده گوردولر دیلینده التماسی وار
بویوردی اولمییدی گر پیمبرون وصیتی
گورردون اوندا تیغیمون قانا نه اشتهاسی وار
بو کلمه نی ایشیتجگین چیغیردی باغلیون قولون
بفوری باغلانوب قولی وصیّته رضاسی وار
کشان کشان آپاردیلار باخاندا زینب آغلادی
دئدی الهی باشیمون نقدری ابتلاسی وار
آنام یخلدی وئردی جان بابامدا گئتدی نیلیوم
دیوم کیمه گئدوم هارا بو زینبون هاراسی وار
علی گئدور ، حسین گئدور باخور دالیجا آغلیور
دولاندی گوردی زینبون دیلینده یا اخاسی وار
چاغردی گل حسین حسین آماندی گئتمه بیر دایان
گلون گورک آنامیزی ئولوبدی یا بقاسی وار
بخش 3
گلوب دولاندی باشینه دایاندی باخدی آغلادی
گوز آچدی گوردی فاطمه عزیزینون عزاسی وار
سوروشدی بس علی هانی، حسین دئدی آپاردیلار
گئدیم گوروم عم اوغلومون باشیندا نه بلاسی وار
علی کئچنده مسجده چکیلدی اگری تیغ لر
دئدیله بیعت ایله یا وجودیوون جزاسی وار
ایمان آوردن یهودی
علی دایاندی دینمدی اوجالدی اوندا هلهله
باخاندا خلق گوردی بیر یهودینون صداسی وار
اوجا سسیله سسلنور الهی شاهد اول گیلان
قبول دینون ایلورم زمانون اقتضاسی وار
دیدیم ئوزوم یهودیَم پیمبره باش اگمدیم
بو صحنه آیری صحنه دور بیر آیری ماجراسی وار
ئوزوم گوزومله گورموشم او باغلانان بیلک لری
ووراندا بُلدی مرحبی بُولوندی هر لباسی وار
او گون که گلدی خیبره بو شهسوار لافتی
دالیندا یدّی یوز نفر قلج ووران فداسی وار
هوایه قالخدی قوش کیمی آتیلدی کئچدی خندقی
گتوردی وردی صحنیه الینده که لواسی وار
اون ایکی مین قلج ووران بفوری چخدی قلعه دن
ائدنده حمله گوردولر نه خوف و نه هراسی وار
ئولن ئولوب قالانلاری داغیتدی توکدی خندقه
بیر عده قاچدی قلعیه دایانماقون خطاسی وار
گلوب یاپیشدی بابیدن تکان وئرنده تیتردی
اوچولدی یدّی ساختمان او قلعه نون بناسی وار
چخارتدی باب خیبری گتیردی قویدی خندقه
او کورپودن گلوب کچوب نقدری آشناسی وار
تعجبم بونون قولون او هانسی ایپدی باغلیوب
نجه گورون دوروب باخور بو محنته رضاسی وار
او قوللاری اون ایکی مین سواره باغلیانمادی
بونون قولونی باغلیان او دینیدور خداسی وار
من ایندی بیلدیم ای خدا بو دین دین حقّیدور
بو دینه مذهبم فدا فناسی یوخ بقاسی وار
قزیشدی بیردن آغلادی قاچوب یخلدی توپراقا
یوزون قویوب ایاقینه ئورکده آه و واسی وار
دئدی آتام آنام فدا او باغلانان بیلک لره
بو بختی قاره نوکرون سنه بیر التماسی وار
صباح قیامتون گونی گلنده صحن محشره
شفاعت الیسون منیم گناهیمون دواسی وار
یوزون دوتوب جماعته دیدی بودور ولیّ حق
سیزون بو دین حقّوزون نقدری خود نماسی وار
مگر وصیت ائتمدی جهانه ختم الانبیا
کتابی بیرده عترتی گورون کیمین وفاسی وار
✔️ آمدن حضرت زهرا سلام الله علیها به مسجد
اوجالدی اوندا هلهله یول آچدی قوم بی حیا
گلوب یتیشدی فاطمه باشیندا بیر عباسی وار
صاقیندا مجتبی گلور آلوب عمامه سین اله
صولوندا یدّی سنّیده حسین کربلاسی وار
حزین سسیله سسلدی آچون عم اوغلومون قولون
عُمَر جواب وئرمدی ریاستون هواسی وار
خانم ال آتدی سینیه چخارتدی غم نشانه سین
الینده گوردولر دوتوب پیمبرون قباسی وار
ازل اُوپوب او کوینگی یاپشدی بُولدی نصفدن
دوتوب هواده ساخلادی هر الده بیر پاراسی وار
او کوینگون پاراسینی حسین باشینا باغلادی
برینده باغلادی حسن باشیندا مدّعاسی وار
حسن حسین قباقیده ایاق گوتوردی فاطمه
یتیشدیلر او قبره کخ یاتوبدی مصطفاسی وار
حسن حسین قوجاقلادی پیمبرون مزارینی
خانم ال آتدی باشینه آتاسینون قراسی وار
ایلیکه ایستدی آچا او قاره نون گِرِه لرون
او قبر پاک تیتردی گوروندی غم هواسی وار
بلا احاطه ایلدی تزلزل ائتدی تیتردی
او مسجدون نقدریکه ستونی وار بناسی وار
گلوب بفوری آچدیلار او باغلانان بیلَک لَری
آییلمادی او بی حیا ریاستون هواسی وار
علینی گَتدی منزله او بانوی مجلَّله
دئدی الهی قلبیمون جلالیوه شناسی وار
یاپیشدی دورت بالاسینون الین دولاندی باشینه
دولاندی باخدی آغلادی نقدری گور وفاسی وار
دییَن یوخودی فاطمه باخوب بوقدری آغلاما
نه تشنه دور نه خسته دور نه غربتون جفاسی وار
حسین گلنده خیمیه رقیه دوندی باشینه
باخاندا گوردی سینه ده ساغالمیان یاراسی وار
اوتوز بش ایل دولانموشام سنون یاسیندا یا حسین
بو بختی قاره « #منعمون » ئورکدن التماسی وار
منیم آخاندا گوزلریم یاسیمدا بیر دقیقه گل
گوزوم گوزونده جان وئریم بو ئولمگون صفاسی وار
رفیق و آشنالره سلام وئردیم آلمادی
رفیقی نیلیور او کس سنه که اتّکاسی وار
- جمعه
- 3
- اسفند
- 1397
- ساعت
- 16:5
- نوشته شده توسط
- ابوالفضل عابدی پور
- شاعر:
-
مرحوم منعم اردبیلی
ارسال دیدگاه