بو گجه یاره گوره نذر و نیاز ایله میشم
وصل شکرانه سینه ذکرو نماز ایله میشم
آلنیما نقش سالیب مِهر ولایت مُهری
وصلتین سجده سینی بس که دراز ایله میشم
ملک ایراندان اوچوب طایر طبعیم صنما
گونلومون مقصدینی ملک حجاز ایله میشم
تا حریم حرم قادر یکتا آچیلوب
کعبه مولودینی من محرم راز ایله میشم
باغلیوب غم یولونی دلبره خاطر دوتولان
قلبیمون پنجره سین شوقیله باز ایله میشم
وئرمرم راحت الیمدن بو سعادت گجه سین
فصل دلگیر خزانی اودی یاز ایله میشم
ناز اگر عاشقه معشوق ائلیور ، فخریله من
فاطمه بنت اسد اوغلونا ناز ایله میشم
من علی شیر خدا حیدر صفدرو آقاما
جان فدا ائتسم الهی گئنه آز ایله میشم
قل هو الله احد ، تکدی علی الله تک
ئوزومی یاره پرستشده مجاز ایله میشم
بو گجه کعبه علی عشقینه مدهوش اولاجاق
مکه گهواره سینه زینت آغوش اولاجاق
سو سپون یوللارینا سرو روانیمدی گلن
صبح و شام ازبر اولان ورد زبانیمدی گلن
شیر یزداندی سالیب عالمه آوازه سی سس
شانی گویلردن اوجا سدره مکانیمدی گلن
قان دامارلاردا دوروب آخماسا والله ئولرم
بونی تفسیر ائلیوم جسمیمه جانیمدی گلن
او گلور لیک توان گئتدی منافقلردن
اری بی شک منیم منیم تاب و توانیمدی گلن
تازه بیر گولدی اونون عطری بهارین عطری
هدیه سبز خدا ختم خزانیمدی گلن
آد علی ، منصبی حیدر ، اسدالله لقبی
صاحب تیغ دو دم شیر ژیانیمدی گلن
ساقیا قووما منی میکده دن جام ولا
باده سین وئر بو قدح جام جهانیمدی گلن
بارک الله بو اوغول عالمه رهبردی گلور
کائنات اشرفینون خیلینه سروردی گلور
باشلیوب حور و ملک گویده مبارک بادین
یا محمد گوزون آیدین که گلور دامادین
سینوین زینتی زهرایه گلور همپایه
حق عزیز ایلیه جاق گللروین اولادین
فاطمه بانوی جنت ئوزی چوخ شیریندی
شکر لِله که خدا لطف ائلدی فرهادین
اولین فرد مسلمان پس از پیغمبر
دییر الله احد عالم آلار فرهادین
بودی خیبر قاپوسین فتح ایلییر بیر اللی
تا که عالم دوشونه فلسفه ایجادین
منبع نور ولایت سالاجاق اون بیر نور
هر بیری روشن ائدر عرش و سما ابعادین
بو قلم قاصر اولار دفتر اولار نا کافی
ائتسه تعریف حسین و حسن و سجادین
شاه ، شاهانه باخیشدان دویا (معروف) محال
قبرین اول گجه سی بذل ائده جاق امدادین
- چهارشنبه
- 15
- اسفند
- 1397
- ساعت
- 19:0
- نوشته شده توسط
- ابوالفضل عابدی پور
- شاعر:
-
ابوالفضل عباسی معروفان
ارسال دیدگاه