گؤزلریم یوللاردادی اوغلوم گله بو محبسه
نیلرم الله رضا آخر نفسده گلمسه
وئر خبر باد صبا ملک خراسان شاهینه
صورتی آیدان گؤزل اون یدی اولدوز ماهینه
عرض قیل گل وئر قولاق خسته اسیرون آهینه
حسرت دیدارووم گل شمع بزمیم سؤنمه سه
اون بیر ئیل هارون منه ظلم و جنایت ایلدی
گؤزلریم آخر قرانلوق حبسه عادت ایلدی
نه بیری دوتدی الیمدن نه حمایت ایلدی
دردیمی بیلمز او کس که درد هجران گؤرمسه
روز و شب اللهه دردیم سویلیوب یالوارمیشام
ائتمیشم از بس دعا سس نه سمایه سالمیشام
منصبیم باب الحوائج بحر غمده قالمیشام
نیلییر بیر پیر سید اون بیر ئیل دینجلمسه
بیر گلم باغ امامت گلشنینده سولموشام
هر گونوم آغلار گئجه زار و مکدر اولموشام
یادیمه اوغلوم دوشنده ابر غم تک دولموشام
کیم سیلر بو گوزلری عالمده اوغلوم سیلمسه
صاق صولا دؤننم ایاقیم یاره سی حالیم پوزار
بوینومون زنجیر یاراسی آغریوب جانیم یورار
غربت ئولکه جان وئرم کیم جسمیمی قبره قویار
ئولمرم واللهی گر درد فراق ئولدورمسه
بیر ایشیق یوخ حسرتیم گون ٬ آیدا اولدوزلاردادی
جان ویرن ساعتدی فکریم باغریقان قیزلاردادی
اون بیر ئیل یول گوزلیین دل خسته یالقیزلاردادی
هیچ گمانیم یوخ خدا سندن علاوه بیر کسه
عشق پاکیمده دایاننام هر زمان داغلار کیمی
سبز اولور ذکرینله قلبیم با صفا باغلار کیمی
دردووه باب الحوائج آغلارام آغلار کیمی
قبروه (معروف) اولار زائر غموندن ئولمسه
- یکشنبه
- 11
- فروردین
- 1398
- ساعت
- 15:25
- نوشته شده توسط
- ابوالفضل عابدی پور
- شاعر:
-
ابوالفضل عباسی معروفان
ارسال دیدگاه