دور یاتما ایتگین قبریده
باغری دؤنن قانه آنا
ئولدی آتام گل کوفیه
شام غریبانه آنا
شوره گلن بلبل نجه گلشن سرانی آختارار
ماتم زده انسان نجه شور و نوانی آختارار
غم یوز وئرنده رسمیدور هر قیز آنانی آختارار
گل گور نه نوعی زینبون غمدن گلوب جانه آنا
ای ماه یثرب کوفه ده شاه ولایت یاسیدور
امّت امامین ئولدوروب تئز گل امامت یاسیدور
ظالملره اولسون خبر حق و عدالت یاسیدور
مظلوملر گلسون گرک بو غمده افغانه آنا
نور هدانی کوفه ده قوم ضلال ئولدوردولر
جهل اهلی شورا قوردولار فضل و کمال ئولدوردولر
مفهوم انسانیّتی شبه الرجال ئولدوردولر
دنیا بویی نسگل اولا آزاده انسانه آنا
کاشانه میز باشدان باشا باخدوقجا غم آثاریدی
گرچه آتام هر محنته بیر نقطه ی پرگاریدی
امّا بیزه سندن صورا بیر مهربان غمخواریدی
غمخواریمیز الدن گئدوب پوزقوندی کاشانه آنا
گرچه مصیبتدن آخار رخساره اشک حسرتیم
شرح ملالیمدن سنه زحمت دگولدی نیّتیم
گل گور آناسیزلار نجه اولدی آتاداندا یتیم
آخماز نجه گوزیاشلاری حسرتله دامانه آنا
گرچه خلاص اولدی آتام رنج و مصیبتدن بوگون
قورتولدی شاه اولیا آزار اُمّتدن بوگون
امّا گرک ماتم دوتا عالم بو محنتدن بوگون
گلمز بابام مثلی داهی بو کون و امکانه آنا
ییرمی بش ایل دؤزدی آتام جور و جفای امّته
بو مدّتی حسرت قالوب بیر اهل دل هم صحبته
درد دلین چاهه دئدی باخ نسگیله باخ حسرته
وورماز بو نسگل لر مگر اود قلب سوزانه آنا
حیرتده دی فکر ایلین چرخین روال و گردشین
باطل لره دوران وئروب حق اهلینون اگدی ایشین
اولدی علی تک ایش بیلن ایللر بویی خانه نشین
دنیا یوزون تنگ ائتدیلر اول شاه مردانه آنا
دنیای خلقتده نجه ممتازیدی شخصیّتی
شخصیت ممتازی تک، تک اولدی مظلومیّتی
اولماز او مظلومیّتین تقریر اولا کیفیّتی
بیر خالق یکتا بولر بیرده او فرزانه آنا
ییرمی بش ایل سندنصورا شاه ولایت اوتدی قان
قالدی الی باغلی دیلی باغلی امیر مؤمنان
باطل لره دوران وئرن دور فلکدن الامان
مظلوم دهر اولدی بابام نفرین بو دورانه آنا
من زینبم گویا اولوب آب و گلیم غمله عجین
گاهی سنون داغون گهی داغ امیرالمؤمنین
بیرگون ایچینده مجتبی دست جفادن زهر کین
اوندا منیم وای حالیمه قالام یانا یانه آنا
فریاد او ساعتدن اولار دشت بلا مسکن منه
نه ماجرا نه کشمکش وار اوردا واضحدور سنه
مَخیَم یانار مقهور اولار آل پیمبر دشمنه
گل اوندا همدم اولماقا جمع پریشانه آنا
الله یولوندا هربلا باشه گله یوخدور سؤزوم
چون اولموشام دلدن رضا هر بیر بلیّاته ئوزوم
اما ئوزون آگاهسن ایستر نه اندازه دؤزوم
یانمیش چادردا ناله و آه یتیمانه آنا
بانی سی اصغر مونسی اولدی ازل بو نوحه نین
بیردن عنایت اولدی تا بو طرزیله یازدی« #حزین»
اللهدان ایسته اونلارا قسمت اولا بیر اربعین
اولسونلا زوّار حرم شاه شهیدانه آنا
- پنج شنبه
- 9
- خرداد
- 1398
- ساعت
- 14:2
- نوشته شده توسط
- ابوالفضل عابدی پور
- شاعر:
-
مرحوم حاج حیدر خسروشاهی
ارسال دیدگاه