ایهاالامّت پیغمبر معصوم و هدی
دین رحمتدی مودّتدی بیزه دین خدا
قدرینی بیلمیوروک حقّین ایدک یاخشی ادا
هر سعادت بلی حق گوندرن احکامده دور
صاف و ساده یاشاماق سایۀ اسلامده دور
نجه گوهردی بودین خبره سی اون دورد معصوم
فقهالرده اولاردان ایلیوب کسب علوم
جوّ اسلامده وار سیرلری مثل نجوم
مکتب مهدی موعودیده دمسازدیلر
پادگان شرف و عزّته سربازدیلر
دوزدی هر زحمته پیغمبر ارزنده خصال
وار خبرده او فروغ ابدی قطب کمال
مکّه ده اون نفرین قاننی ایتمشدی حلال
حضرت ختم نبی دن بیله دستوریدی
هر مسلمان اولارون قتلنه ماموریدی
آیۀ فتح مُبینون اثری اولدی عیان
لشگر دین آپاروب لشگر کفری آرادان
کعبه بامنده بلال حبشی ویردی اذان
اون نفر کسکه بویورمشدی رسول مختار
سگّیزی قتله یتشدی ایکسی ایتدی فرار
عَکره میدی بیری فرزند ابوجهل دغا
بیری صفوان اُمیّه هدفی ضدّ خدا
عکره مه قاچدی بیابانه اله دوشمیه تا
ولی صفوان گوروب قاچماقا یوخ راه امان
اُمّ هانینون ایوینده اوزینی ایتدی نهان
اونی تعقیب ایلدی شیر خدا یوزده نقاب
یتشوب مقصده سرعتله او معصوم جناب
اُمّ هانینون ایدوبدور قاپوسین دقّ الباب
اُمّ هانی کیمیدی حیدر صفدر باجیسی
مادّه شیریدی اودا شیر دلاور باجیسی
فتح باب ایلدی بی وحشت او پاکیزه تبار
چهره پوشیده گوروبدور دایانوب بر سر دار
دیدی کیمسن کیمیله واردی ایشون قیل اظهار
دیدی مولا اونا سرباز رسول اللّهم
دشمنی بوردا پناهنده اولوب آگاهم
لکّۀ کفریله آلوده اولوب دامانی
طبق فرمان پیمبر گرک آخسین قانی
واردی قصدیم یتورم کیفرینه صفوانی
اُمّ هانی دیدی سنّتدن اوزاقدور بو سخن
سنه تسلیم ایدم هیهات پناهده می من
دوزدی سن افسر اسلام سن ای مرد رشید
تابع دین خدا حضرت طاهایه مُرید
آمرانه دانشوب ایتمه منی چوخ تهدید
لشکر دین ده سرداریدی قارداشیم علی
حاضرم ئولمگه امّا دیمرم زوره بلی
رقّته گلدی علینون اورگی بو سوزدن
توکدی آئینۀ رخسارینه اشگین گوزدن
جوشلانوب عاطفه سی آچدی نقابین یوزدن
دیدی احسن باجی مین شور یاراتدون منده
اوخشیوبسان اؤزومه واهمه یوخدور سنده
باجنون قارداشا دوشدی گوزی سسلندی علی
عرصۀ رزم لرین مرد ظفرمندی علی
سنه قربان اولا ایکاش اورگیم بندی علی
ساغری عشق و محبّتلری دولدی قاپودا
باجی قارداش ایکیسی قول بویون اولدی قاپودا
محضر ختم رسوله یتشوب بو جریان
مرتضانون باجیسی مشرکی ایتمش پنهان
دیدی تأمین ویرون یانیمه گلسین صفوان
هر ائوه گئتسه پناهنده تاپار امنیّت
حسنینون بی بی سین ایلمیون ناراحت
زندگی مژده سی القصّه چاتوب صفوانه
چخمادی قالدیقی ائودن گنه ده بیر یانه
اُمّ هانیده پذیرائی ایدوب مهمانه
بُلدی پیغمبر اونون قلبیده وار پرواسی
ظاهره چخماقا یوخدور ابداً یاراسی
دئدی ابن وَهَبه مفخر سادات جهان
اُمّ هانی ائوینه گیت ایله صفوانه بیان
سوزوموز سوزدی بیزیم اولماسین اصلا نگران
بیزدن آسیب یتیشمز اورگی دینجلسین
آپار عمّامه می ویر باشنه قویسون گلسین
منیم عمّامه مه خاطر اولونار حرمت اونا
باشه دستاریمی قویسا یتیشر عزّت اونا
هر یره گتسه وجوده گلور امنّیت اونا
امر پیغمبری اجرا ایلدی ابن وهَب
چاتمیوب ختم نبی مکتبینه هیچ مکتب
آلدی عمّامه نی صفوان قویوبدور باشنا
دیدی بو لطفی چتین قارداش ایده قارداشنا
هدف اولماز داخی جان شیشه سی قتلین داشنا
مُرده روحی دیریلوب چهره سی شاداب اولدی
محضر سیّد مختاره شرفیاب اولدی
قیلدی تکلیف اونا اسلامی رسول مدنی
دیدی صفوان نچه گون سیز قویون آزاد منی
فکر معقول ایلیوم مقصدیم اولسون علنی
عقل یاری ایلسه فیض هدایت تاپارام
مدد غیبی کمک ایتسه سعادت تاپارام
منطقون دوزدی پیمبر بویوروب صفوانه
نچه گون فکر ایلیورسن ایله آزادانه
یوخ کراهت ابداً دین ده ای فرزانه
هر قدر قالسون ائویمده دوتارام حرمتوی
میهمانسان منه حفظ ایلرم امنیّتوی
نچه گون منزل طاهاده اولوبدور مهمان
ختم پیغمبرون اخلاقینه اولدی حیران
ایوده قلبی داریخان لحظه لرینده صفوان
باشدا دستار نبی سیره چخوردی علنی
حُرمت ایلوردی اونا کوچه ده اهل وطنی
بوراجاق شعر خبر پیکرینون جامه سی دور
ولی بوردان صوراسی نوحه دی غم نامه سی دور
سوزومون محوری پیغمبرین عمّامه سی دور
کافری حفظ ایدن عمّامه قلجدان یارادان
ایتی شمشیره دچار اولدی بولوندی آرادان
کربلا شاهی حسین بن علی قطب زمان
گوزل اوغلون ایلین لحظه ده میدانه روان
مظهر جدّینه فکر ایتدی اولا حِرزِ امان
غرق ایدوب خیمه ده کیپریگلرینی گوز یاشنا
همان عمّامه نی قویدی علی اکبر باشنا
آناسی درک ایلدی اوغلونی بوینوندا کفن
دیدی روشندی علی دوغراناجاقدور بو بدن
باشدا عمّامه سنه باخجاق او مهجور وطن
وار امیدیم دئدی ای شبه رسول مدنی
باخوب عمّاموه ئولدورمیه کُفّار سنی
روبرو اولدی سپاهه او پیمبر سیما
اولمادی کوفه شیوخینده نجابت اصلا
بو حسینون دئدیلر اوغلیدی یا که طاها
عجبا صورتنون گور نه وجاهت واریدی
جدّی تک باشدا یاشیل تاج سیادت واریدی
کاش حسین بیعت ایده زادۀ بوسفیانه
بو جوان حیفدور آخر یخلا میدانه
نه روادور او گوزل گوزلری باتسون قانه
قتل نفسه ایلدوک دشت بلانی مرکز
مُسلموک بیز هَله کافرده بونی ئولدورمز
قزشوب جنگون اودی شعله چکوب آتش کین
اولان اولدی نه دیوم یخدیلا لیلانون ایوین
مُنقذ ظالم ایدوبدی یولون اوستنده کمین
نقشۀ قتل علی اکبری طرح ائتدی او دم
ایکی بولّم دیدی الان بو آئی نامردم
صیدینه حمله ایدوب دالدان او صیّاد دنی
کامه روباه چاتوب تیتردی شیرین بدنی
زن صفت سالدی توانادن او شمشیر زنی
دگدی شمشیر ایلدی قانیله توأم باشنی
بُولدی پیغمبرون عمّامه سنی هم باشنی
یاره کاریدی ز بس بلمدی اکبر اوزینی
آخدی قان شدّتیله هوردی قرا قاش گوزینی
چتر آچوب طُرّۀ طرّاری دوتوبدور یوزینی
اهلی سن فکر ترازوسنه قوی بو سوزی چک
کاکلی گردنینه دوشدی بنفشه ساچی تک
سینوی مشعل ایله دودۀ آهی دله یاخ
سویله ای گوزیاشی زمزم کیمی رخساریمه آخ
بیر باشی یاره غزاله نچه مین اوچیا باخ
شبه پیغمبرین اطرافین آلان دشمنی گور
جسمینه قالخوب اَنن خنجری گور نیزه نی گور
غصّه سی یوخدی گنه رزمده وورسا تکی تک
رسمدن چخدی ولی کوفه نون اهلی نه دیمک
اولدی جسمی او جوانون فدکون مدرکی تک
سیز دیورسوز که یره زیندن اکبر دوشدی
ولی من عرض ایدورم لالۀ پرپر دوشدی
بالا آتدان یخلوبدور آتا گلدی هاینا
الی قوینوندا دوروب باخدی بولونمش آینا
دیدی یارون سایا گلمز یتمشم من ساینا
زرهون تک گورورم گوز گوز اولوب جامون اوغول
باش آچیق سان هانی پیغمبری عمّامون اوغول
باشینی آلدی دیز اوسته اوجالوب افغانی
دیندیروبدی زکریّا یارالی یحیانی
قوجا یعقوب صدا ایتدی مه کنعانی
گلمیشم شوره دئدی سنده هوسلن یارالی
سسیوه مشتریم بیر آتا سسلن یارالی
آغلورام دشمن ایچنده سنه خاطر گوزون آچ
حنجریمده اوجالان شیونه خاطر گوزون آچ
خسته سن منده غریبم منه خاطر گوزون آچ
قبله گاهم سنه آخر گوزلیم قبلیه باخ
گونی گور باشوین اوسته آخان اولدوز کیمی آخ
- پنج شنبه
- 9
- خرداد
- 1398
- ساعت
- 14:10
- نوشته شده توسط
- ابوالفضل عابدی پور
- شاعر:
-
مرحوم انور اردبیلی
ارسال دیدگاه