ای آدین قربان اَیا موسی الرّضا جان الدّخیل
منبع احسان اَیا موسی الرّضا جان الدّخیل
.
.
سن کرم دریاسی سن ای شاه اِقلیم عطَا
دردمندوق سن آنان زهرا جانی ایله دوا
چوخ امیدیله بو درگاهه دخیل اولدوق آقا
عالمه سلطان اَیا موسی الرّضا جان الدّخیل
.
.
مفخر اهل ولا بو عالمه پیرایه سن
قیل کرامتله کرم سال باشیم اوسته سایه سن
لطفیله باخسان اگر قطره دونر دریایه سن
لطفی بی پایان اَیا موسی الرّضا جان الدّخیل
.
.
دوندَرَن ای جنّتُ الاعَلایه شهر مشهدی
قبله حاجات اولان عشّاقه انور مرقدی
ای اولان احسان و لطفی مستمنده سرمدی
ناطق قرآن اَیا موسی الرّضا جان الدّخیل
.
.
ای قالان معصومه سی دیدارینه حسرت آقا
شیعه لر اولسون رضا اوُل مرقد پاکه فدا
آغلاروق اوُل حالیوه اولدون وطندن سن جُدا
ای مه تابان اَیا موسی الرّضا جان الدّخیل
.
.
ای قالان معصومه سی گوز یولدا پوزقون ناگران
سسلنن هر روز و شب قارادش رضاجان هارداسان
غم اسیری اولموشوق سندن صورا قارداش اینان
دردیمه درمان اَیا موسی الرّضا جان الدّخیل
.
.
.
✔️ زبانحال #حضرت_معصومه در فراق حضرت امام رضا
.
.
باجیوام قالموش گوزوم قارداش یولوندا انتظار
گوزلرین قربانی گل معصومه نی غمدن قوتار
سویگلُوم سندن صورا بو قلبیمی غملر دوتار
ای عزیز جان اَیا موسی الرّضا جان الدّخیل
.
.
قارداش ای جان جهان اولموش وطن غربت منه
شمع تک یانّام غمنده اشگ آخار بودامنه
بیقرارون وار وطنده گوز تکوب قارداش سنه
اولموشام گریان اَیا موسی الرّضا جان الدّخیل
.
.
سنسیز ای شمس هُدا یثرب بیزه زندان اولوب
ایلروق آه و فغان گوزلرده گوز یاش قان اولوب
لانه ی زنبور تک غمدن اورک شان شان اولوب
چون یوروب هجران اَیا الرّضا جان الدّخیل
.
.
روز شب سنسیز منیم اشگیم اولار گوزدن روان
صولموشوق بیر گُلِ کیمی قارداش اسوب باد خزان
گوزلریم قالموش یولوندا ای رضا جان ناگران
حجّت سبحان اَیا موسی الرّضا جان الدّخیل
.
.
یانّام عشقنده سنون معصومیم پروانه وار
اولموشام دائم فراقنده رضا جان بیقرار
محنت و هجرین قرار صبریمی الدن آلار
ایلرم افقان اَیا موسی الرّضا جان الدّخیل
.
.
تای توشوم سویلر منه چاتمور الین قارداشیوه
بیر ده گلسن یثربه قارداش دولانّام باشیوه
جان معصومه فدا ایکّی هلالی قاشیوه
گوزلرین قربان اَیا موسی الرّضا جان الدّخیل
.
.
«رضوی» آلدین جوانلقدا غم و حسرت دله
کشتی امیدین اَمّا دوشدی حیف اولسون گله
ضامن آهودن ایسته تا چخاتسون ساحله
ای ملک دَربان اَیا موسی الرّضا جان الدّخیل
.
.
.
- سه شنبه
- 23
- مهر
- 1398
- ساعت
- 15:8
- نوشته شده توسط
- ابوالفضل عابدی پور
- شاعر:
-
محمدرضا بیگلی
ارسال دیدگاه